Ministra Edukasaun, Juventude no Desportu Dulce de Jesus Soares. Imajen/António Gonçalves.

DILI, 12 fevereiru 2020 (TATOLI) – Ministra Edukasaun, Juventude no Desportu, Dulce de Jesus Soares, hateten daudaun ne’e rejista ona atleta hamutuk 500-resin hosi nasaun membru Comunidade dos Países de Língua Portuguesa (CPLP) hodi partisipa jogu CPLP ne’ebé sei realiza iha Timor-Leste.

“Agora daudaun rejista tiha ona, hela de’it mak Giné Ekuatoriál maka seidauk, ne’ebé hosi Ministériu Negosia Estranjeiru halo nafatin komunikasaun ho sira hodi partisipa. Agora, ami rejista ona atleta hamutuk 500-resin maka sei mai, ne’e seidauk inklui delegasaun sira, maibé kuandu inklui maka hamutuk na’in 700-resin maka mai iha Timor-Leste hodi partisipa iha jogu CPLP no mós konferénsia Ministériu Juventude no Desportu CPLP”, Dulce de Jesus Soares informa ba jornalista sira iha Palásiu Governu, ohin.

Iha reuniaun Konsellu Ministru ohin, aprova ona proposta deliberasaun ne’ebé aprezenta husi Ministra Dulce de Jesus Soares no Sekretáriu Estadu Juventude no Desportu, Nélio Isaac Sarmento, ba autorizasaun orsamentál ho valór $511.250, ba Organizasaun Konferénsia Ministru Juventude no Desportu CPLP no Jogu Desportivu CPLP ba dala-XII.

“Preparasaun ein termu infraestrutura ba atleta sira, no mós ba abertura no sekretariadu ne’ebé maka sei funsiona iha tempu badak. Orsamentu ne’e ba preparasaun nian tanba ita uma na’in entaun fatin sira ne’ebé uza ba desportu tenke kompletu”, katak.

Dulce de Jesus Soares subliña Timor-Leste sei hetan vantajen boot hosi eventu ne’e, tanba partisipa hosi delegasaun estranjeiru ho númeru boot.

“Tanba ne’e foin primeira vez, depois ita ukun rasik-an, sai uma na’in ba jogu internasionál ida no hosi eventu ne’e hanesan mós oportunidade ida atu promove ita-nia nasaun ba iha nasaun CPLP, no mós iha rejiaun ne’e hotu katak ita iha kapasidade atu realiza jogu internasionál ida ne’e hodi partisipa hosi ema barak mai haree ita-nia kultura, no promove ita-nia turizmu”, dehan.

Dulce katak fó mós oportunidade ba ita-nia oan sira ne’ebé hatene ko’alia portugés atu mós sira envolve hanesan voluntáriu, apoia delegasaun hosi nasaun sira ne’e bá vizita fatin istóriku no fatin turístiku sira iha país laran.

Jogu ne’e sei partisipa hosi nasaun sia ne’ebé hamahan an iha organizasaun CPLP ne’ebé sei realiza iha 12-22 jullu 2020.

Orsamentu ne’ebé sei aloka ba jogu ne’e rasik parte tékniku SEJD propoin tokon 2-resin.

Notísia relevante : KM Autoriza Utilizasaun Orsamentu $511.250 ba Preparasaun Jogu CPLP

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here