Komandante UPF, Superintendente, João Belo dos Reis observa hela mina ilegál ne’ebé UPF halo apreensaun. Imajen/PNTL

BATUGADE, 11 fevereiru 2020 (TATOLI) – Durante tinan 2019, Polisia Nasionál Timor-Leste (PNTL) liu husi Unidade Patrullamentu Fronteira (UPF) kaptura sidadaun estranjeiru no Timoroan hamutuk ema na’in 1.013 maka hala’o atividade tama sai ilegál iha fronteira Timor-Leste.

Notísia Relevante : UPF Husu Sosa Tan Kuda 10 ho Asu

Ema na’in 1.013 ne’e kompostu husi na’in 760 husi  eis membru Grupu Arte Marsiál (GAM) no na’in 253 kompostu husi sidadaun Timoroan no estranjeiru.

Ema sira ne’e kaptura iha postu fronteira, Mota Masin, Suai, Citrana Oe-Cusse, Mota-Ain, Badut-Mean, Leo-Hitu, Nunura, kuartél Kompañia Alfha Tunubibi, Mozon, Memo, Postu Saburai no Oe-cusse nian.

Komandante UPF, Superintendente  João Belo dos Reis,  ba Ajénsia TATOLI iha Kuartél Jerál UPF, ohin, iha  Batugade, hateten, ema hirak ne’e parte UPF entrega ba ekipa investigasaun kriminál Komandu Polisia Munisípiu Bobonaro, Covalima no Oe-Cusse hodi prosesa kazu balun ba Ministériu Públiku no julga iha tribunál.

Apreensaun ba Mina Ilegál Tonelada 53

Durante tinan 2019 mós UPF liu husi operasaun halo mós apreensaun (foti) sasán kontra bandu ne’ebé hanesan mina rai ilegál tonelada 53, solar, gazolina, sigarru Surya 12, Marlboro, L.A no Joker inklui sasán nesesidade báziku.

“Mina rai ilegál ne’ebé ita prende iha 2019 ne’e hamutuk tonelada   53 ne’ebé rai iha Postu Batugade, Suai no Oe-Cusse nian,” João Belo dos Reis hateten.

Tuir nia katak, atividade negósiu ilegál ne’e fó prejuízu ba estadu lakon osan no parte PNTL prosesa kazu ne’e tuir lei hodi sasán nain sira selu multa ba governu tuir kalkulasaun sasán.

Parte UPF kaptura mós Timoroan balun ne’ebé fa’an ai-kalemi, tua, foos, no sasán nesesidade báziku balun ba sidadaun Indonézia sira.

Apreensaun Ba Karreta Hitu no Ró Haat

Iha parte seluk, UFP prende mós karreta ilegál hamutuk hitu (7) ne’ebé Timoroan sira hatama ilegál husi Indonézia no ró ilegál haat (4).

“Ita prende mós karreta ilegál haat (4) kompostu Fortuner foun ida (1), Kijang Grand Mex 3 no iha Oe-Cusse prende mós karreta Pickup 1 no karreta Terrios 2,” João Belo dos Reis tenik.

Komandu UPF koopera mós Alfándega hodi halo operasaun iha tasi prende mós ró ilegál tula sigarru, tua no mina rai, solar, no gazolina.

João dehan, mezmu halo servisu UPF enfrenta dezafiu menus rekursu, ekipamentu, radio komunikasaun no transporte, maibé UPF kontinua hala’o ninia misaun tuir prosedimentu pratika ka funsaun espesializada.

Durante ne’e UPF hala’o patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho F-FDTL.

 Atu koopera ho autoridade administrativa relevante sira seluk tuir lejizlasaun fiskál, Aduaneira no sanitaria. Atu aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk.

UPF mós durante ne’e kria liña koordenasaun di’ak no Tentara Nasional Indonesia (TNI) no Polisi Republik Indonesia (POLRI) hodi halo kontrolu servisu seguransa iha fronteira rai rua.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here