Timor-Leste Press Union (TPLU) ho Instituisaun no Edukasaun Cerimonia Asina Nota Entendimento ba iha Area Jornalista. Imajen Tatoli/Egas Cristóvão

DILI,11 fevereiru 2020 (TATOLI)-Timor-Leste Press Union (TLPU) ho Institute of Education (IE) asina nota intendimentu hodi serbisu hamutuk iha kapasitasaun rekursu umanu, liliu iha área língua no mós jornalizmu nian.

“Ha’u hatene hanesan oportunidade ba ita TLPU ne’e mak dahuluk kapasitasaun, abilidade ba iha língua tanba iha Institutu Edukasaun iha formasaun língua portugeza, inglés entaun ha’u hanoin ida ne’e  ita mós hola parte atu sai mós formandu,” Prezidente TLPU, Manuel Pinto, hateten liuhusi nia diskursu, iha salaun Esperansa, Elemloi, ohin.

Ho asinatura Nota Intendementu ne’e, Prezidente TLPU, Manuel Pinto agredese ba disponibilidade IE nian hodi serbisu hamutuk iha setór edukasaun. “Edukasaun ne’e pasaporte ba futuru; ita idaidak tenke prepara aan, adapta ba kapasidade individu. Prepara ita-nia aan ba buat ne’ebé di’ak”

Nia dehan, kapasitasaun jornalizmu TLPU bele kontribui hanesan formadór. Ema dehan kooperasaun ne’e estabelese hanesan simbiosis mutualizme; iha ligasaun ho depedénsia.

“Ba pergunta ida ne’e ha’u sei fó oportunidade ba media hothotu ho vontade la iha limitasaun atu tuir formasaun ne’ebé mak iha lian portugés, inglés. Karik membru TLPU nian ne’ebé mak iha vontade ha’u hanoin bele tuir. Oportunidade ne’e nakloke”

“Esperansa katak ita TLPU ba oin bele aproveita  másimu tanba fatin Institutu Edukasaun ne’e buat ne’ebé ita aproveita mak língua tanba ita hotu hatene katak durante ne’e língua mak sai problema boot ba ita jornalista sira. La’ós membru TLPU maibé jornalista hotu bele aproveita másimu liuhusi koñesimentu TLPU nian.

Kona-ba inplementasaun, Prezidente TLPU, Manuel Pinto informa: “Semana ida ne’e nia laran ami ko’alia kona-ba tékniku oinsá mekanizmu koperasaun ne’e realiza no hanoin iha fulan oin marsu sei realiza ona ita nia formasaun ne’e”.

Iha parte seluk, Diretór IE, António Guterres esplika katak edukasaun ne’e xave ida importante ba dezenvolvimentu tanba ne’e IE prontu servi juventude sira iha área oioin haktuir ba Planu Estratéjiku Dezenvolvimentu (PED) IE nian.

Ezekutivu ne’e mós kompromete katak IE prontu hatutan vizaun foin hodi hakat ba oin. Maske nune’e, nia espera governu bele mós tau-matan ba sentru formasaun sira inklui mós IE hodi mellora liután kuaalidade formasaun iha tempu tuir mai.

Diretór António Guterres hateten mós katak setór edukasaun no kapasitasaun rekursu importante nune’e iha tempu oin mai, sei diskute entre IE ho TLPU rasik.

Entretantu, TLPU, nu’udar organizasaun ida ne’ebe buka hadi’a, halibur hamutuk jornalista sira ne’ebé servisu ba media imprime, eletróniku ho online.

TLPU hala’o nia atividade ho independénsia husi estadu, governu, patronatu, partidu polítiku sira, Igreja, Klube sira, sosiál ka desportivu nune’e mós ba sira ne’ebé mak iha karakter públiku ka privadu.

TLPU luta maka’as ba defeza jornalista sira nian, ida-idak no hotu-hotu nian no halo tuir loloos nia knaar, liuliu ba deontolójiku jornalista sira nian, atu nune’e mós bele defende maka’as nia direitu atu hetan informasaun, ho direitu ema hotu nian ne’ebé hetan informasaun loloos no justisa.

TLPU defende livre ba negosiasaun kolektiva, ho respeitu tuir norma sira ne’ebe legál no konvensionál.

Vizaun no Misaun TLPU nian mak Promove jornalizmu ne’ebé iha étika hodi hato’o informasaun ho kualidade atu atinje demokrasia ne’ebé reál (vizaun) no fó advokasia ba jornalisa timoroan ne’ebé sai membru TLPU no defende direitu jornalista sira nian (misaun). TLPU ne’e rasik hahú eziste iha loron 9 agostu 2008.

Partisipa iha serimónia asinatura Nota Intendimentu entre TLPU ho IE mak ezekutivu no membru TLPU sira balun no asiste direta husi membru Konsellu Estadu, José dos Santos Naimori “Bucar”, inklui Sekretáriu Estadu Formasaun Profisionál no Empregu (SEFOPE), Julião da Silva no mós Vise-Ministru Obras Públika (MOP), Nicolau Lino Freitas Belo.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here