Prezidente Komisaun Funsaun Públika (CFP-sigla portugés), Faustino Cardoso Gomes. Imajen/António Gonçalves.

DILI, 11 fevereiru 2020 (TATOLI) – Prezidente Komisaun Funsaun Públika (KFP), Faustino Cardoso, husu ba servidór Estadu hotu atu utiliza sasán Estadu ho responsabilidade. 

“Ba servidór Estadu hotu atu vijilante, alertadu ba tentasaun sira hodi labele utiliza sala sasán Estadu, oposta ba imi-nia integridade, tenke la’o tuir valór Funsaun Públika hodi nune’e ita sente orgullu katak povu mós fó nafatin konfiansa, no avante nafatin ba funsaun públika, glorifika ita-nia eroi no povu liuhusi prátika ita-nia servisu”, Faustino Cardoso apela iha ámbitu fó pose ba kargu xefia Institutu Apoiu ba Dezenvolvimentu Emprezariál (IADE) iha salaun IADE, Bebora, Dili, ohin.

Tanba ne’e’, KFP husu ba família atu apoia sira ne’ebé nu’udar servidór Estadu nian, maibé ho apoia pozitiva. “Keta halo simu tiha telemovel, bá uma oan, kaben husu katak fó lai telemovel, mai uza tiha ba interese seluk, afinál ne’e sasán Estadu nian, osan Estadu nian, ne’e labele akontese, tenke uza sasán Estadu tuir nia fatin ho responsabilidade, ne’e hatudu ita-nia integridade”, katak.

Eis Prezidente Komisaun Nasionál Eleisaun (CNE, sigla portugés) ne’e afirma pozisaun sira nu’udar diretór ezekutivu, xefe, ou titular kargu saida de’it ne’e la’ós direitu. “Karreira sim! Grau, eskalaun ne’e ida-idak nia direitu, maibé kargu diresaun xefia ne’e tanba konkistada, maibé determinadu tempu tuir dekretu lei 25/2016 maka tinan haat”, dehan.

Tanba ne’e maka iha dekretu lei 26/2016 liuhusi artigu 15 no 16 define klaramente bainhira iha sirkunstánsia sira balu ne’ebé maka kontempla prienxidu automatikamente bele hetan sesasaun eventual no automátika.

“Sesasaun eventual signifika katak hetan tiha ona nomeasaun hala’o serbisu laloos, la tuir ezijénsia instituisaun nian, la hatudu rezultadu pozitivu, klaru katak kabe mós iha avaliasaun dezempeñu no ikus mai hetan ezonerasaun ou substituisaun, ne’ebé labele neon metin ona ho kargu ne’ebé iha”, hatete.

Hodi husu atu lalika hanoin ida ne’e, maibé atu sente seguru tenke hatudu dezempeñu ho kualidade, responsabilidade, integridade, labele hali’is ba A ou B, maibé tau aas interese Estadu, povu ou interese kliente.

“No sesasaun automátika dehan katak bainhira iha Governu foun mai estrutura foun sei la kontempla ona estrutura ida ne’ebé oras ne’e responsabiliza ba tenke husik hela ona, labele hein fali to’o tinan haat, no husu indemnizasaun ne’e hanoin laloos”, afirma

Tanba ne’e maka Prezidente KFP ne’e alerta ba servidór sira atu vijilánsia ba sirkunstánsia saida de’it maka sei akontese bainhira hala’o kna’ar.

Jornalista : Antónia Gusmão

Editora : Maria Auxiliadora  

HAKEREK NO HATÁN

Please enter your comment!
Please enter your name here