Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão.

DILI, 11 fevereiru 2020 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, hateten sei kria mekanizmu sistema transferénsia finanseira liuhosi kooperasaun ho Banku Nasionál Komérsiu Timor-Leste (BNCTL, sigla portugés) hodi ko’alia ho banku lokál Austrália, atu ajénsia sira ne’ebé traballadór timoroan serbisu bá bele transfere osan bá ne’ebá, hafoin haruka fali ba BNCTL.

Depois ida ne’e, família hosi traballadór sira bele foti osan iha Timor-Leste. “Ita la’ós atu bá estabelese banku iha ne’ebá, maibé ita koopera ho BNCTL, atubele aprosima ho banku sira lokál iha Austrália, nune’e ajénsia sira ne’ebé fó serbisu bá traballadór sira bele transfere osan ba banku lokál Austrália, hafoin transfere fali ba BNCTL, atu família traballadór sira bele simu de’it iha Timór”, nia dehan ba Ajénsia TATOLI iha salaun Esperansa Elemloi, ohin.

Ida ne’e mekanizmu ne’ebé atu hafasil traballadór timoroan iha Austrália bainhira manda sira-nia osan mai Timor-Leste, maibé antes atu halo, SEFOPE sei ko’alia asuntu ne’e ho parte BNCTL no ajénsia sira iha Austrália atu haree ida ne’e.

“Agora, ami tenke husu BNCTL no ajénsia sira iha Austrália atu oinsá maka bele transfere osan ba banku sira, maibé molok ida ne’e, SEFOPE sei haree didi’ak prosedimentu legál sira tanba liga ba finansiamentu ne’e iha risku”, katak.

Tanba ne’e, SEFOPE sei haree hodi halo memorandu entendimentu ida ho BNCTL, atu haree nia prosedimentu legál sira, nune’e estabelesimentu sistema transferénsia osan ba BNCTL labele hetan problema.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here