Sesaun plenária Parlamentu Nasionál. Imajen/TATOLI

DILI, 11 fevereiru 2020 (TATOLI)—Parlamentu Nasionál (PN) aprova votu pezár ba saudozu Moises Guimarães ‘Piksy Mau’ hodi rekoñese veteranu ne’e nia luta ba prosesu luta ba libertasaun nasionál.

Sesaun plenária ne’e dirije hosi Prezidente Parlamentu Nasionál Interinu atuál Segundu Vise-Prezidente Parlamentu Nasionál, Luís Roberto. Reprezentante povu sira aprova votu pezár ne’e ho votu a-favór 54, kontra 0 no abstensaun 0.

Segundu Vise-Prezidente Parlamentu Nasionál, Luís Roberto, hateten veteranu tinan 24 merese hetan votu pezár tanba sira-nia kontribuisaun ba rai ida-ne’e.

“Votu pezár bai ita-nia saudozu Piksy Mau aprovadu”, nia dehan liuhosi plenária Parlamentu Nasionál, tersa ne’e.

Purtantu, Reprezentante Bankada Parlamentár FRETILIN, Agostinho Somoxo, hateten saudozu Piksy Mau merese hetan respeita.

“Lori bankada FRETILIN nia naran, ha’u hakarak hato’o ami-nia kondolénsia kle’an no solidariedade forte ba saudozu Piksy Mau nia kaben, señora Joana Soares. Saudozu Piksy Mau merese ita hotu nia hakruuk no respeita husi Uma-Fukun Parlamentu Nasional ida-ne’e, no Estadu tomak ne’ebé nia fó nia vida tomak ba atu harii, defende no hametin”, Somoxo tenik liuhosi plenária, tersa ne’e.

Somotxo mós hato’o sentida kondolénsia kle’an ba saudozu nia oan sira hanesan Sancha Maria Titi Guimarães, Mouzinho Latu Guimarães, Mafilde Lourença Titi Guimarães, Matilde Baptista Titi Guimarães, Jesuinha Cassa Titi Guimarães Soares, Calisto Alvares Tilman Leo Soares Latu Guimarães no Ajencio Alvares Tilman Leo Soares Latu Guimarães.

Biografia Saudozu Piksy Mau

Saudozu Piksy Mau moris iha Aldeia Chai, Suku Loré I, iha loron-15 fulan-Maiu tinan-1963. Husi tinan-1970 to’o tinan-1974, saudozu frekuenta eskola pre-primária no primária iha Lospalos.

Maibé tanba mosu Revolução dos Cravos iha Portugal no hatán ba vokasaun sagradu Luta Libertasaun Pátria nian, mak saudozu konsege de’it hala’o ninia estudu to’o segunda classe, no husik ninia estudu hodi hahú ninia jornada funu-na’in nian ho otas ne’ebé sei nurak.

Bainhira partidu sira hahú moris iha Timor Portugés nu’udar konsekuénsia ida hosi mudansa polítika iha Portugál hafoin Revolução dos Cravos, saudozu Piksy Mau tuur hela iha eskola primária, segunda classe iha Lospalos.

Bainhira Frente Revolucionária de Timor-Leste Independente (FRETILIN), ba hanorin povu Timor-Leste tomak, no to’o iha Lospalos hodi fanu povu Maubere nia konsiénsia ba Ukun Rasik-An liuhusi kore povu husi ki’ak no mukit no hasai povu husi nakukun laran, Piksy Mau adere kedas an ba FRETILIN.

Iha tinan-1975, Piksy Mau sai ona membru ba FRETILIN nia organizasaun juvenil momentu ne’ebá, Organizasaun Populár Juventude Timor (OPJT) iha Zona Loré.

Invazaun forsa invazór nian iha tinan-1975 nia rohan no tanba operasaun militár ne’ebé sira hala’o, saudozu hamutuk ho ninia família tomak hala’o marsa naruk ida husi Loré mai to’o Foho Matebian, tuir FRETILIN nia lideransa no orientasaun.

Iha fulan-novembru tinan-1978 nia rohan, hafoin forsa invazór militár Indonézia nian kontrola ona baze-apoiu Foho Matebian, saudozu fahe malu ho ninia família boot no deside ba hamutuk ho ninia maun sira hanesan Valente Guimarães, Mouzinho Guimarães no Lino Guimarães ho ninia primu irmaun sira, hodi hela iha ailaran hamutuk ho FRETILIN nia dirijente sira atu kontinua luta ba Timor-Leste nia Ukun Rasik An.

Baze-apoiu Foho Matebian rahun tiha, saudozu Piksy Mau tun ho forsa FALINTIL sira husi Foho Matebian no halo marsa naruk filafali ba Lospalos.

Iha ne’ebá, saudozu hola parte iha Núkleu Foti Oin iha Loré parte leste. Iha reorganizasaun FALINTIL nian iha tinan-1975, saudozu hala’o knaar nu’udar soldadu iha Destakamentu Gerilla Leste, iha parte leste zona Loré iha primeiru komandante destakamentu Gerilla Leste, komandante Dinis Conceição “Mauhanek” no sigundu komandante Luciano Ximenes “Zeny Henry Kalikas” sira-nia komandu.

Iha tempu sesar-fogu ka kontak damai iha tinan-1983, saudozu hala’o knaar nu’udar siguransa pesoál ba Komisariu Polítiku FRETILIN, saudozu Orlando Mauvelis.

Iha tinan-1984, saudozu hetan konfiansa hodi hala’o fali knaar nu’udar seguransa pesoál ba Komisáriu Polítiku Nasionál FRETILIN no Komandante en Xefe FALINTIL nian, Kay Rala Xanana Gusmão.

Iha tinan-1987, grupu seguransa ida-ne’e koñesidu ho naran grupu Koto Moruk ne’ebé hala’o operasaun iha área Paichau, no saudzu Piksy Mau nomeadu sai komandante seksaun.

Sira-nia knaar mak atu asegura Komandante en Xefe nia moris no ninia serbisu. Husi tempu ne’ebá to’o tinan-1999, saudozu kontinua hamriik metin iha filleira FALINTIL nian hodi hala’o knaar oioin ne’ebé mak Komandu Luta fó ba saudozu.

Hafoin transformasaun FALINTIL ba ezérsitu militár FALINTIL-Forsa Defeza Timor-Leste (FFDTL), saudozu Piksy Mau hola parte iha F-FDTL no kontinua serbisu atu hametin Timor-Leste nia independénsia liuhosi knaar oioin hahú husi serbisu informasaun iha Primeira Batalliaun F-FDTL iha Lospalos iha tinan-2002 hafoin restaurasaun independénsia, mai to’o iha Kuartel Jerál Fatuhada, Dili.

Tamba ninia serbisu no matenek mak iha tinan-2001, saudozu promovidu ba diviza tenente. Iha tinan-2005, saudozu hetan promosaun no ninia diviza sa’e ba Kapitaun. Iha tinan-2009 to’o tinan-2011, saudozu asume knaar nu’udar xefe interinu Dinfomil J/2 iha kuartel Jerál Tasi-Tolu, Dili.

Husik tiha kargu ida-ne’e hodi ba frekuenta formasaun, iha tinan-2015. Hafoin ramata ninia formasaun, saudozu promovidu ba diviza majór.

Husi tinan-2015 to’o tinan-2016, saudozu asume filafali knaar nu’udar xefe interinu Dinfomil J/2 iha Kuartel Jerál F-FDTL, Fatuhada, Dili.

To’o loron ne’ebé saudozu husik iis iha loron-5 fulan-fevereiru tinan-2020, saudozu hala’o knaar nu’udar Xefe Serbisu Informasaun Militár F-FDTL nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here