Prezidente PD no Atuál Deputadu Bankada PD, Mariano Assanami Sabino. Imajen Tatoli/ Egas Cristóvão

DILI, 11 fevereiru 2020 (TATOLI)—Prezidente Partidu Demokrátiku (PD), Mariano Assanami Sabino hateten opsaun movimentu polítiku hanesan alternativa ida atu teri-netik Eleisaun Antesipada (EA).

“Opsaun ida maka partidu iha asentu Parlamentár bele buka-malu no ko’alia, karik bele hamosu alternativa para la bá Eleisaun Antesipada. Hamosu Governu foun ida iha de’it korridór loron 60 nia laran. Se ida-ne’e la akontese, ita bá ona Eleisaun Antesipada. Opsaun ne’e iha Prezidente Repúblika ka laiha Prezidente Repúblika mós dalan maka ne’e duni”, Assanami informa ba Agência TATOLI, iha resintu Parlamentu Nasionál, tersa ne’e.

Nia afirma, PD nia hanoin katak Eleisaun Antesipada ne’e rekursu ikus maibé Eleisaun Antesipada ne’e la’ós hamriik iha kotuk liu, tanba loron 60 maka la akontese formasaun Governu foun, diretamente bá kedas iha Eleisaun Antesipada.

“Durante loron 60 ne’e maka la aprezenta programa no orsamentu foun entaun Parlamentu disolvidu ona tanba la funsiona. Se Parlamentu disolvidu, úniku dalan atu forma Parlamentu foun maka Eleisaun Antesipada”, nia esplika.

Maibé, tuir Assanami, ba Partidu Demokrátiku importante liu maka tenke rezulta governasaun ida-ne’ebé efetivu, efisiente no akomodativu hodi hakotu impase.

Nune’e mós, nia dehan, labele iha tan governasaun ida instrumentu ida refleta ba de’it ódiu no vingansa de’it tanba ne’e depende ba hotu-hotu para ko’alia, liuliu líder partidu polítiku sira hotu katak dalan ne’e la luan-liu, maibé kloot.

Nia afirma, kloot tanba Timor-Leste hasoru resesu mundiál no coronavirus da’et hela, presiza tau forsa no enérjia hamutuk hodi hasoru moras ida-ne’e.

“Ne’e hotu maka ita hotu tenke kaer nafatin konsisténsia, entaun PD haree katak la’ós de’it ita tau númeru hamutuk para kaer ukun maibé oinsá maka ita bele serbí di’akliu no ita bele halo saudável ba ita-nia instituisaun Estadu para fortalese sira no sira hamriik hodi serbí di’akliu”, Prezidente PD ne’e fó hanoin.

Governu deside retira proposta OJE 2020 ho montante biliaun $1.995 iha loron 3 dezembru (faze jeneralidade loron daruak), tanba la estruturadu no inskonstitusionál.

Nune’e, Governu kumpre rekomendasaun Parlamentu Nasionál (PN) nian hodi redús ba biliaun $1,668. Proposta ne’e Governu aprezenta hikas ba PN iha 19 dezembru 2019.

PN hahú debate iha loron 15, 16 no 17, maibé iha loron ikus faze jeneralidade, orsamentu ne’e la pasa ho votu a-favór 13, kontra 15 no abstesaun 25.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here