HNGV. Foto google

DILI, 11 fevereiru 2020(TATOLI)-Ospitál Nasionál Guido Valadares (HNGV) selebra  loron mundiál ba ema moras dala-XXVIII ho lema “Mai Besik Ha’u, Imi Hotu Ne’ebé Kolen no Terus Ha’u Sei Fó Kma’an Ba Imi” ne’ebé foti hosi Matius 11:28.

Iha selebrasaun ne’ebe monu kedas iha HNGV nia mahein ne’e, selebra ho santa misa ne’ebe prezide husi reprezentante Arsebispu Metropolitana Dili, Pe. Immanuel Lelo Talo iha HNGV, Dili.

“Ita selebra Na’in feto Maria lurdes nia loron iha Ospitál Nasionál Guidu Valadares ida ne’e, no mós ita selebra loron ema moras sira nian iha mundu tomak. Hahí ba Maromak basa Ospitál Nasionál ne’e tinan-tinan selebra festa ida ne’e ho santa misa,” Padre selebrante, Imanuel Lelo Talo, dehan iha ninia omilia ba selebrasaun loron mundiál ema moras ba dala-XXVIII iha HNGV, ohin.

Iha sarani sira-nia leet, nia hatutan, santa misa mak importante liu buat hotu-hotu tanba ema moras sira rona de’it ai-knananuk Maromak nian, ema moras sira bele isin di’ak fila fali.

Tuir nia, santa misa eukaristia katak agradese ba Maromak hodi oferese buat di’ak hotu-hotu husi ita-nia aan. Bainhira Nain Feto hatudu aan la’ós iha igreja maibé iha fatin bain-bain ida no fatin bain-bain sira ne’e sai hanesan fatin uma-kreda nian.

“Entaun, fatin Ospitál Nasionál Guido Valadares mós sai hanesan fatin ne’ebé mak ema moras sira-nian maibé fatin ne’e la’ós kura sira nia isin lolon de’it maibé sai fatin kura ba klamar nian,” nia hateten.

Bainhira kura isin-lolon maibé klamar la duun, nia dehan, ida ne’e signifika ita-nia moris la kompletu tanba ne’e mak isin-lolon no klamar tenke tau atensaun hotu.

Tanba ne’e, nia haklaken, uma kreda mós hakna’ar nailulik balun iha ne’e atu nune’e médiku sira atu tau matan ba isin-lolon nian no amu-lulik tau matan ba klamar nian.

“Tanba ne’e mak ami agradese ba Maromak, tinan-tinan selebra ema moras nian hodi komemora sira-nia loron no hodi selebra mós Nain Feto Lurdes nian ne’e grasa ua’in ida mak HNGV simu,” nia dehan.

Iha fatin hanesan, Diretór Kliniku HNGV, Flavio Brandão hateten tinan-tinan HNGV selebra loron moras ida ne’e iha HNGV atu tane ema moras sira tanba ne’e mak Jezús mai hanesan médiku ida hodi mai hanesan servidór ida.

“Iha loron mundiál ida ne’e singnifika katak oinsá renova fali ita-nia juramentu hanesan médiku, parteira, tékniku, aliadus, ita-nia lala’ok hanesan servidór ne’e halo ona ka lae. Entaun, ita ida-idak fila hodi refleta juramentu ne’ebé mak ita sente todan la’os kmaan ida ne’e mak ita refleta didi’ak,” nia esplika.

Niai informa, utente sira ne’ebé durante tinan 2019 iha HNGV tuir dadus ne’ebé hatudu hamutuk rihun 21 resin populasaun ne’ebé mak hetan atendimentu iha HNGV ne’e, ita la konsege salva ema hamutuk rihun 600 ne’e vida.

“Katak, ida ne’e hatudu katak la to’o 1 ka 2 % ne’ebé mak ita la salva ho razaun oin-oin. Ida ne’e evidénsia hatudu katak ita la aat liu ho nasaun sira seluk,” nia haktuir.

Tanba ne’e, nia fo razaun katak espiritu servidór médiku sira iha HNGV ne’e sira serbi ho sira-nia responsabilidade tomak nu’udar umanu. Tan ne’e, husu ba populasaun sira fó konfiansa nafatin ba HNGV tanba HNGV hanesan uma-mahon ba ita hotu nian.

Partisipante sira ne’ebé partisipa iha selebrasaun loron mundiál moras ba dala-XXVIII ne’e mak Vise Ministra Kuidadu Saúde Primaria, brigada kuba, xineza , xefe unidade, xefe departamentu, madre sira inklui pasiente sira-nia família.

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here