DILI, 10 fevereiru 2020 (TATOLI)–Diretora Nasionál Rekursu Umanus Ministériu Saúde, Tomasia de Sousa informa, ho fundu Dezenvolviemntu Kapitál Umanu, Governu Timor-Leste sei fasilita médiku jerál timoroan sira ba foti área espesialista hodi hala’o sira-nia estudu iha nasaun Cuba, Fiji, Beijing no Indonézia.

“Governu liuhusi Ministériu Saúde ne’ebé apoiu husi fundu Dezenvolvimentu Kapitál Umanu, sei haruka médiku jerál sira ba foti espesialista iha nasaun ne’ebé mak ita hili ona. Médiku ne’ebé mak ita haruka ba kuba hahú iha tinan 2017 no sira seluk ba iha nasaun tolu ne’e iha tinan 2015 no 2016,” dehan Tomasia de Sousa ba jornalista sira iha nia kna’ar fatin, palasiu da Sinzas, Caicoli, Dili, ohin.

Nia hatutan, iha tinan 2018-2019, Governu seidauk haruka médiku sira ba estudu iha rai liur maibé haruka de’it ema ba tuir treinamentu kona-ba kapasitasaun ba iha kurtu prazu ninian.

Tanba, nia dehan, iha tinan 2020 Governu nafatin tau planu no sei haruka tan médiku timoroan sira ba estudu iha área espesialista nian.

“Médiku sira ne’ebé mak foti espesialista ne’e bazeia ba Ministériu Saúde nia planu,” nia dehan.

Tanba, tuir nia, durante ne’e Ministériu Saúde koopera ho brigada Cubana no sira fó hela asisténsia ba iha área espesialista. Tanba ne’e mak hakarak ka lakohi Timor mós prepara ona rekursu umanus atu nune’e ba oin Governu labele depedénsia ba nasaun seluk.

“Ministériu Saúde iha nia polítika ida katak molok tinan 2030 ne’e ita hakarak espesialisita hotu-hotu iha Timor liu-liu iha unidade saúde ne’e tenke priense ona. Molok tinan 2030, ita-nia postu saúde sira tenke priense ona ho ita-nia espesialista sira,” nia esplika.

Tuir planu, nia haklaken, médiku timoroan sira ne’e sei ba hala’o estudu iha área espesialista ne’e hamutuk ema 39. Espesialista ne’ebé mak Timor-Leste presiza liu mak iha Sirurjia, Pediatria Interna no Oftamolojista.

“Espesialista ida ne’e mak tuir politika Ministériu Saúde nian no espesialista hamutuk ema 39 ne’e distribui husi Hospitál Nasionál Guido Valadares no ospitais referais sira,” nia esplika.

Razaun, nia infroma, médiku timoroan sira ne’ebé ba foti espesialita ne’e bazeia ba problema saida mak Timor-Leste enfrenta no resposta ba situasaun reál ne’ebé mak saúde publiku sira enfrenta.

Daudaun ne’e, nia informa, espesialista ne’ebé mak iha Cuba hamutuk ema 29 no na’in haat mak foti área maestradu nian kona-ba saúde públika no sira seluk ne’e ba área espesialista nian hanesan Kardiolojia, Onkolojia interna.

“Espera katak balun fila ona iha tinan ida ne’e. Hanesan iha Cuba, maestradu sira na’in haat (4), na’in rua (2) ramata uluk ona no rua seluk sei ramata iha tinan ida ne’e. Tinan oin, sira espesialista mós fila hotu no na’in lima mak sei iha tinan 2022 mais máioria ita bele kompleta ona ita-nia espesialista,” nia haktuir.

Tuir nia, se Ministériu Saúde iha planu haruka médiku atu foti espesialista entaun sira mai Minitériu Saúde tenke akomoda ema sira ne’e tanba Governu investe osan barak ba sira no sira mai tenke kontirbui hodi hala’o knar.

“Ministériu saúde la abandona ita-nia médiku sira ne’ebé mak ita haruka ba estuda tan espesilista sira. Entaun, sira fila tenke enkuadra sira ba iha espesialista maibé tenke liuhusi prosesu nia laran,” nia esplika.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here