Prezidente FFTL, Francisco Jerónimo. Imajen Mídia FFTL

DILI, 11 fevereiru 2020 (TATOLI)–Prezdente Federasaun Fureból Timor-Leste (FFTL), Francisco Jerónimo hateten federasaun kada tinan tenke hala’o kongresu anuál hodi diskute ezekusaun orsamentu sira ne’ebé gasta ona iha tinan tuan.

Tanba ne’e, kongresu dalimak  FFTL nian iha 2020 hala’o ona iha 8 fevereiru liubá iha Hotel Timor, Dili.

“Kongresu ne’ebé ami hala’o foin lalais bazeia ba estatuta FFTL nian. Kada tinan ami tenke hala’o kongresu hodi diskute serbisu durante tinan tuan halo ona, tuir kedas ho auditoria no halo mós aprovasaun ba auditoria esterna ne’ebé mai hosi Federation International Football Association (FIFA) no Asian Football Confedration (AFC) entaun ami tenke halo aprovasaun ba ida-ne’e,” Francisco ba Agência Tatoli iha edifísiu FFTL, Bairro Formosa, Dili, tersa ne’e.

Aleinde ne’e,  nia informa, kongresu ida-ne’e mós nia objetivu atu haree no hadi’a filafali estatutu federasaun nian nune’e bele la’o hanesan ho estatutu FIFA no AFC.

“Kongresu ne’e la’o di’ak tebes. Parte hotu konkorda hodi hadi’a ami-nia problema sira. Problema ami-nian mak haree filafali ba estatutu liuliu halai ba ami-nia problema iha komité tanba komité ne’e barak tebes. Tuir realidade Timor, komité la presiza barak demais. Depois ida-ne’e aprova mós artigu 77. Artigu Ida-ne’e importante loos atu ko’alia kona-ba futeból ne’ebé mak iha artigu sira anteriór ne’e la mensiona Liga iha estatuta entaun ami hatama artigu ne’e hodi aprova,” nia subliña.

Nia hatutan, artigu ne’e aprova tanba FFTL iha mehi boot atu kria Liga iha futuru no mós kopa iha Timor laran. Kuandu atu realiza sei la presiza tan halo alterasaun ba estatutu maibé hein implementa de’it.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here