Emposada kargu xefia IADE asina dokumentu posse ne’ebé akompaña hosi MKAE interinu, Fidelis Manuel Leite Magalhães no Prezidente KFP, Faustino Cardoso, ne'ebé hala'o iha salaun IADE, Bebora, Tersa (11/02/2020). Imajen TATOLI/Antónia Gusmão.

DILI, 11 fevereiru 2020 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, garante katak estrutura foun Institutu Apoiu ba Dezenvolvimentu Emprezariál (IADE) bele presta servisu di’ak liután ba povu liuliu sira ne’ebé haknaar an iha setór privadu.

“Importante mai ita atu selebra okaziaun ida ne’e katak ministériu ida ne’ebé tau-matan ba asuntu ekonomia nian ho nia ajénsia sira hadi’a di’ak liután nia estrutura no konsege atu halo esforsu di’ak liután hodi marka ninia prezensa iha territóriu tomak”, atuál Ministru Reforma Lejizlativa no Asuntu Parlamentár (MRLAP) dehan hafoin fó pose ba estrutura kargu xefia IADE na’in-24 iha salaun IADE, Bebora, Dili, ohin.

“La’ós de’it sira ne’ebé maka sei okupa knaar iha sede IADE nasionál ne’e, maibé mós sira ne’ebé hosi munisípiu, ida ne’e importante tebetebes tanba ekonomia sei la la’o bainhira instituisaun sira ne’ebé iha apoia dezenvolvimentu iha setór ekonómiku ne’e laiha kapasidade sufisiente. Ne’ebé ho estrutura foun ne’e kapasita liután ita-nia Governu atubele presta servisu di’ak liután ba sidadaun sira, liuliu setór privadu”.

Fidelis mós husu ba IADE atu sai ezemplu ba instituisaun hirak ne’ebé ho efisiente, kualidade, no mós ba governasaun di’ak.

“Governasaun di’ak katak iha jestaun administrativa ida ne’ebé di’ak, jestaun finansa ne’ebé nakloke, no jestaun rekursu umanu ne’ebé di’ak. Instituisaun hirak ne’ebé iha setór ekonómiku labele sai instituisaun ne’ebé korruptu liu iha Timor-Leste, se ita sai instituisaun hirak ne’ebé korruptu liu, dezenvolvimentu iha Timor-Leste sei la la’o”, afirma.

Hodi fó ezemplu simples hanesan atribuisaun ba apoia ne’ebé maka IADE sei fó ba empreza sira, ninia impaktu ne’e tenke kontribui duni ba empreza nia dezenvolvimentu no buat ne’ebé labele halo maka labele fó de’it subvensaun ne’ebé iha ba kolega ou família de’it.

Tanba ne’e maka MKAE interinu husu ba IADE, ba oin haree mekanizmu oinsá bele kapasita entidade IADE nian atubele kapasita fali setór privadu sira.

“Husu ba ita-boot sira liuliu iha munisípiu atu servisu makaas hodi fó treinamentu ba setór privadu sira, haree liu ba sira ne’ebé maka iha duni koñesimentu, matenek ne’ebé se ita apoia karik la monu leet, no hadi’a métodu koñesimentu”, sujere.

Notísia relevante : KFP Husu Emposadu 24 husi IADE Tenke sai Servidór Di’ak

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here