Anche Cabral. Imajen espesiál

DILI, 11 fevereiru 2020 (TATOLI)–Eis siklista timoroan, Francelina Márques Cabral ‘Anche’ ho inisiativa rasik loke atividade Push Bike hodi halibur labarik ki’ikoan iha mundu siklizmu.

“Agora daudaun ha’u loke hela atividade Push Bike. Atividade ne’e ha’u prepara ba labarik ki’ikoan sira. Atividade ida-ne’e halo ho ha’u-nia inisiativa rasik komesa kedas iha tinan kotuk,” Anche ba Agência Tatoli via rede sosiál, tersa ne’e.

Nia esplika, Push Bike hanesan atividade bisikleta ba labarik ki’ik sira ne’ebé ema sempre halo iha rai-li’ur.

“Atividade ne’e iha Timor-Leste seidauk hala’o. Tanba ne’e, ha’u iha inisiativa rasik loke atividade ida-ne’e ajuda fó treinu skill báziku no mós halo eventu ba sira,” Anche haktuir.

Nia hateten, iha tinan kotuk, eventu ne’e hala’o dahuluk hetan partisipasaun másima hosi labarik feto no mane hamutuk 20.

Prémiu ne’ebé oferese ba labarik sira iha atividade ne’e, primeiru lugár simu trofeiu 1. Enkuantu, fahe mós kadernu, lapizeira no botlle hemu bee nian ba kategoria vensedór hosi primeiru to’o kintu.

Tanba ne’e, bá-oin, Anche kontinua hala’o atividade refere nune’e bele halibur labarik ki’ikoan sira.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here