Anche Cabral. Imajen espesiál

DILI, 11 fevereiru 2020 (TATOLI)–Eis Siklista Timor-Leste, Francelina Márques Cabral ne’ebé ho naran koñesida Anche Cabral susesu sai komisária nasionál ba União Ciclismo Internasional (UCI-sigla Portugeza) hafoin termina nia kareira hanesan siklista ida.

Nia hateten, sente orgullu bele sai hanesan komisária nasionál ba UCI, iha ne’ebé bele ajuda Federasaun Siklizmu Timor-Leste (FCTL-sigla Portugeza) hodi realiza eventu nasionál no internasionál sira.

“Ha’u agora hanesan komisária nasionál UCI nian. Ami-nia serbisu mak ajuda federasaun hodi realiza eventu nasionál hamutuk ho komisáriu internasionál sira tuir regra UCI nian,” Anche ba Agência Tatoli via rede sosiál, tersa ne’e.

Daudaun ne’e tanba Anche eskollidu sai hanesan komisária mak nia sei labele partisipa iha eventu internasionál UCI nian hanesan Sea Games, Asian Games no eventu seluk tan.

“Ha’u hetan ha’u-nia diploma hanesan komisária kle’ur ona maibé ha’u tenke hili! Se ha’u hakarak sai komisária ha’u labele tuir eventu UCI nian hanesan Sea Games, Asian Games no eventu UCI sira seluk. Tanba ne’e mak iha tinan kotuk ha’u deside atu sai komisária de’it,” nia haktuir.

Hanesan komisária, Anche foin mak partisipa iha eventu internasionál rua kona-ba siklizmu nian iha nasaun Malázia.

Nia dehan, durante estájiu atu sai komisária, esperiénsia barak mak nia hetan hosi UCI no konsege aplika iha eventu sira ne’ebé FCTL realiza.

“Durante estájiu ha’u aprende barak tanba hetan pozisaun diferente. Uluk sai siklista maibé agora sai hanesan komisária hodi organiza eventu. Serbisu ne’ebé ha’u halo hanesan komisária hahú kedas husi rejistrasaun ba siklista, halo inspesaun ba perkursu/rute ne’ebé siklista sira sei halai no hahú kompetisaun ba siklista sira tuir idak-idak nia kategoria. Ezemplu, kategoria Master, Elite Feto no Mane, Junior Feto no Mane, Juvinel Feto no Mane,” nia haklaken.

Diploma ne’ebé Anche hetan tanba tuir kursu ne’ebé hanorin hosi komisáriu internasionál UCI sira, hafoin ramata tenke tuir ezame foin bele hetan sertifikadu no diploma.

Maibé iha Timor-Leste ema ne’ebé hetan diploma hodi sai hanesan komisáriu iha na’in-haat de’it hanesan Anche Cabral, Gedio da Costa Silva, Dircia Alves no João Mendonça. Enkuantu, hirak seluk hetan de’it sertifikadu.

Entretantu, Anche envolve iha mundu siklizmu iha 2009 bainhira Tour de Timor eziste no nia hanesan feto úniku ne’ebé liu iha selesaun partisipa Tour de Timor.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here