Eis Defeza Selesaun Nasionál, Filipe Oliveira. Imajen/Espesiál

DILI, 10 fevereiru 2020 (TATOLI) – Klube Primeira Divizaun, Aitana FC daudaun ne’e komesa tau matan hela ba eis defeza selesaun nasionál, Filipe Oliveira hodi reforsa ekipa ne’e iha époka dalimak iha Liga Futeból Amadora (LFA).

Jogadór Filipe Oliveira dehan, nia parte hetan ona kontaktu hosi Aitana FC atu nia bele hamutuk ho klube ne’e, maibé nia rasik seidauk fó rezultadu pozitivu.

“Lós! Ha’u hetan ona kontaktu hosi Aitana, maibé ha’u seidauk foti desizaun ruma tanba ha’u sei haree didi’ak klube sira ne’e”, tenik eis defeza Karketu Dili FC ba Agência TATOLI via telemovel, segunda ne’e.

Maski idade komesa la’o ona ba oin, maibé la sai obstáklu ba eis jogadór selesaun nasionál ho númeru kamizola 4 ne’e hodi kontinua nafatin kareira hanesan jogadór, nune’e nia talentu labele mate.

“Iha époka ne’e, ha’u sei partisipa nafatin. Kona-ba klube maka ha’u sei haree lai”, nia akresenta.

Filipe nu’udár jogadór ida, ne’ebé ninia kontribuisaun ba Karketu iha époka daruak konsege lori ekipa kapitál Dili ne’e sai kampiaun iha tinan 2017.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here