Prezidente Repúblika, Francisco Guterres Lú Olo, ohin, hala'o reuniaun ho líder istóriku sira, iha Palásiu Prezidente Nicolau Lobato, segunda (10/02/2020). Imajen Tatoli/Egas Cristóvão

DILI, 10 fevereiru 2020 (TATOLI)–Prezidente Repúblika (PR), Francisco Guterres Lú Olo, kontente tanba líder Istóriku sira simu konvite husi Xefe Estadu hodi marka prezensa iha diálogu nasionál, ne’ebé hala’o iha Palásiu Prezidente Nicolau Lobato, Bairru Pité, Dili, ohin. 

“Prezidente Repúblika, ho haksolok konvida ita-nia líder istóriku no nasionál sira, ho mós Kay Rala Xanana Gusmão atu mai hotu iha reuniaun ida-ne’e para ha’u bele rona diretamente sira-nia opiniaun, kona-ba situasaun polítika ida-ne’e. Prezidente Repúblika nia vontade mak ida-ne’e duni. Ha’u rasik kontente tanba maun sira, líder nasionál sira, líder istóriku sira, ohin sira bele simu ha’u-nia konvite ida-ne’e hodi mai hasoru-malu ho ha’u, hodi ko’alia pontu hirak ne’ebé iha”, PR Lú Olo espresa sentimentu kontente ba mídia hafoin enkontru.

Entretantu, pontu sira importante ne’ebé mak asenta iha reuniaun ne’e mak hanesan, primeiru, Eleisaun Antesipada (EA) hanesan rekursu ikusliu. Segundu, Partidu polítiku sira ne’ebé mak iha asentu Parlamentár, tenke halo movimentu polítiku, oinsá bele dezeña sira-nia opiniaun, sira-nia hakarak, atubele hetan solusaun ba impase polítiká ida-ne’e. Terseiru, Primeiru-Ministru, Taur Matan Ruak sei mantein hanesan Primeiru-Ministru ba VIII Governu Konstitusionál to’o hetan solusaun ba situasaun polítika iha rai-laran.

Enkontru ne’e, maski eis-Prezidente Repúblika, eis Primeiru-Ministru, Negosiadór Prinsipál ba Fronteira Marítima no Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, la marka prezensa, maibé partisipa másima husi eis-Prezidente Repúblika, José Manuel Ramos Horta, eis-Prezidente Repúblika no atuál Primeiru-Ministru, Taur Matan Ruak, eis-Primeiru-Ministru I no VII Governu Konstitusionál, Marí Alkatiri, Xefe Estadu Maiór-Jenerál FALINTIL-FDTL, Majór-Jenerál Lere Anan Timur no veteranu Roque Rodrigues.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here