Diretór Jerál Arte no Kultura, Manuel Ximenes Smith. Imajen: Nelia Fernandes

DILI, 10 fevereiru 2020 (TATOLI)—Diretór Jerál Sekretáriu Arte no Kultura, Manuel Ximenes Smith hateten, ho orsamentu doudesimál ba fulan fevereiru mai iha Sekretária Estadu Arte no Kultura (SEAK), iha planu atu halo implementasaun ba iha preparasaun ba programa sensibilizasaun kona-ba papél no polítika nasionál kultura nian ba eskola sira iha Munisípiu Dili.

“Ita haree katak ho orsamentu duodésimu ba fevereiru 2020 nian ba SEAK, ita la’o nafatin ho orsamentu ne’ebé hanesan iha fulan janeiru nian. Orsamentu ba saláriu vensimentu hamutuk $43.796 no Bens Serbisu $83.541 ne’ebé totál hamutuk $145.837. Orsamentu ne’e fahe ba dirasaun sira atu halo sira-nia planu hodi halo sensibilizasaun ba estudante sira,” Manuel Ximenes Smith ba Agência TATOLI liuhusi entrevista iha nia knaar fatin, Avenida de Portugal, Dili, ohin.

Nia hatutan, dirasaun balun hahú halo ona planu preparasaun ba programa sensibilizasaun iha eskola balun iha Munisipiu Dili no tuir orientasaun atu halo ona viajen lokál ba grupu benefisiáriu sira iha 2019, liuhusi sira-nia orsamentu transferénsia públiku.

Tuir nia, ekipa de verifikadór sira sei tuun ba verifika atu rekoopera foti fila fali relatóriu kona-ba iha orsamentu ne’ebé fó ona apoiu ba grupu kulturál, uma lulik sira ne’ebé mak hetan ona apoiu.

“Restante dirasaun patrimóniu nian halo ona liña koordenasaun sira. Prepara hotu ona termu referénsia ho eskola balun Dili laran, atu hahú ona sira-nia prosesu sensibilizasaun ka diseminasaun ba estudante sira kona-ba importánsia patrimóniu kulturál ba iha estudante sira,” nia hateten.

Programa sensibilizasaun sira, nia esplika, normalmente dirasaun ida mak halo no sei kompostu husi dirasan sira seluk. Tanba, nia dehan, primeiru sira ko’alia kona-ba Papél Sekretáriu Arte no Kultura, Politika SEAK no ko’alia mós kona-ba importánsia ba serbisu kada dirasaun ninian.

“Ita sei haklaken hotu ba estudante sira, para bele kuñese kona-ba papél kultura nian loloos no polítika nasionál kultura nian,” nia hateten.

Nia haklaken, orsamentu duodésimu difikulta ba serbisu SEAK ni’an tanba nu’udar serbisu tékniku ka funsionáriu públiku nia parte koko atu haree no utiliza ho orsamentu ne’ebé volume kiikoan atu bele utiliza ho sira-nia jestaun rasik.

“Ita tenke la’o tuir ita-nia kuridór labele obriga an. Maibé hakarak ka lakohi atividade ne’e funsióna la’o hanesan bainbain. Nu’udar servidór estadu, nu’udar makina estadu, ne’e hakarak ka lakohi orsamentu bele kiikoan mais ita-nia funsionamentu ne’e tenke la’o nafatin,” nia dehan.

Notísia relevante:SEAK Planeia Sei Realiza Festivál Nasionál Kulturál Iha Lospalos

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here