Lider istóriku sira reprezenta hosi Prezidente Repúblika, Francisco Guterres Lú Olo, bainhira dadalia ho jornalista sira hafoin ramata enkontru, iha Palásiu Prezidente Nicolau Lobato, segunda (10/02/2020). Imajen Tatoli/Egas Cristóvão

DILI, 10 fevereiru 2020 (TATOLI)–Rezultadu enkontru husi líder istóriku sira ho Prezidente Repúblika (PR), Francisco Guterres Lú OLo, iha Palásiu Prezidente Nicolau Lobato, Bairru Pite, Dili, ohin, prodús pontu importante tolu no entre pontu tolu ne’e Eleisaun Antesipada (EA) hanesan rekursu ikusliu. 

“Ba povu Timor-Leste tomak, maun-alin no inan-feton sira hotu, ba jornalista sira ne’ebé mak hein husi dadeer to’o loraik ne’e, ha’u hakarak atu fó-sai ba públiku tomak hanesan Prezidente Repúblika, katak, hahú iha loron 20 janeiru, Prezidente Repúblika asume tomak situasaun polítika ne’ebé mak mosu iha Parlamentu Nasionál (PN), bainhira PN rasik la husik Orsamentu Jerál Estadu (OJE) 2020 liu. Nune’e, ha’u promove diálogu ho partidu polítiku sira, líder istóriku sira, sosiedade sivíl, veteranu sira, konfisaun relijioza sira, ho ema barak ne’ebé mak ha’u simu iha fatin ida-ne’e, hodi rona sira-nia pontu devista kona-ba situasaun polítika ne’ebé mak oras ne’e daudaun akontese iha ita-nia rai”, Xefe Estadu informa.

“Ikusliu, Prezidente Repúblika ho haksolok konvida ita-nia líder istóriku no nasionál sira, ho mós Kay Rala Xanana Gusmão atu mai hotu iha reuniaun ida-ne’e atu ha’u bele rona diretamente sira-nia opiniaun kona-ba situasaun polítika ida-ne’e. Ohin, ami na’in hirak-ne’e halo reuniaun, pontu sira importante ne’ebé asenta iha reuniaun ida-ne’e mak, primeiru, Eleisaun Antesipada (EA) hanesan rekursu ikusliu. Segundu, partidu polítiku sira mak iha asentu Parlamentár, sira hotu tenke halo movimentu polítiku oinsá mak bele dezeña sira-nia opiniaun, sira nia hakarak, atubele hetan solusaun ba impase polítika ida-ne’e. Terseiru, Primeiru-Ministru Taur Matan Ruak sei mantein hanesan Primeiru-Ministru ba VIII Governu Konstitusionál to’o hetan solusaun ba situasaun polítika iha ita-nia rain”, Prezidente Repúblika hato’o ba mídia hafoin ramata enkontru.

Xefe Estadu hakarak akresenta tan katak Prezidente Repúblika halo diálogu ida-ne’e hodi buka solusaun ida-ne’ebé di’akliu ba rai ida-ne’e liuhusi hanoin husi líder sira hotu atubele ultrapasa situasaun ida-ne’ebé oras ne’e daudaun la’o hela.

Nia hatutan, Prezidente Repúblika nia vontade mak ida-ne’e duni no Prezidente rasik kontente tanba líder istóriku sira ohin bele simu konvite ida-ne’e hodi mai hasoru-malu hodi ko’alia pontu hirak refere.

Enkontru ne’e, hala’o durante oras neen, hahú husi tuku 09: 00 ramata iha tuku 16:00 otl.

Partisipa iha enkontru ne’e mak husi líder polítiku no personalidade sira mak hanesan eis-Prezidente Repúblika, José Manuel Ramos Horta, eis-Prezidente Repúblika no atuál Primeiru-Ministru, Taur Matan Ruak, eis-Primeiru-Ministru I no VII Governu Konstitusionál, Marí Alkatiri, Xefe Estadu Maiór-Jenerál FALINTIL-FDTL, Majór-Jenerál Lere Anan Timur no veteranu Roque Rodrigues.

Entretantu, Eis-Prezidente Repúblika, eis Primeiru-Ministru, Negosiadór Prinsipál ba Fronteira Marítima, Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, la marka prezensa iha enkontru ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here