Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 10 fevereiru 2020 (TATOLI)–Prezidente Repúblika (PR), Francisco Guterres Lú Olo, husu ba partidu polítiku (Parpol) asentu Parlamentár sira atu hahú daudaun movimentu polítiku para fó solusaun ba impase polítika rai-laran.

“Partidu polítiku sira mak iha asentu Parlamentár, sira hotu tenke halo movimentu polítiku oinsá mak bele dezeña sira-nia opiniaun, sira-nia hakarak, atubele hetan solusaun ba impase polítika ida-ne’e”, Xefe Estadu ba jornalista sira iha Palásiu Prezidente Nicolau Lobato, Bairru Pité, segunda ne’e.

Nia haktuir, hahú iha loron 20 janeiru, Prezidente Repúblika asume tomak situasaun polítika ne’ebé mak mosu iha Parlamentu Nasionál (PN), bainhira Parlamentu Nasionál (PN) rasik la husik Orsamentu Jerál Estadu (OJE) 2020 liu.

Tanba ne’e, Xefe Estadu informa, diálogu ne’ebé nia konvoka ho partidu polítiku sira, líder istóriku sira, sosiedade sivíl, veteranu sira, konfisaun relijioza sira no ema barak, ho intensaun atu solusiona impase polítika ne’e.

Iha okaziaun ne’e, Lú Olo deklara katak Primeiru-Ministru Taur Matan Ruak sei mantein hanesan Primeiru-Ministru ba VIII Governu Konstitusionál to’o hetan solusaun ba situasaun polítika iha nasaun ne’e.

Jornalista: Cipriano Colo

Editór: Xisto Freitas

2 KOMENTÁRIU

  1. Senariu n Nai PR mk dezenha th ona atu esklui th MB Xanana hs mundu politikus nian mb keta hlha ktk MB Xanana duni mk fo’o apoiu tomak atu MB Lu-olo sai prezidente. Husik ba Nai Maromak, Rai lulik ho Matebian sr mk sei tetu 🙏

HAKEREK NO HATÁN

Please enter your comment!
Please enter your name here