Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 10 fevereiru 2020 (TATOLI)–Maski líder istóriku, Kay Rala Xanana Gusmão la marka prezensa iha diálogu nasionál ne’ebé konvoka husi Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin, maibé Xefe Estadu fiar katak, nu’udár líder boot ida, Xanana lakohi atu situasaun ne’e kontinua fó terus ba nia povu. 

“Ha’u hanoin, mezmuke ohin nia (Xanana Gusmão) la mai, maibé ha’u hatene katak líder Xanana Gusmão, nia líder boot ida. Nia mós lakohi situasaun ida-ne’e atu kontinua fó terus ba nia povu. Ha’u fiar katak, ohin la mai, maibé iha tempu seluk dalaruma kala nia bele dispoin nia vontade atu hamutuk hodi hetan solusaun”, Xefe Estadu hato’o ba mídia hafoin enkontru ho líder nasionál sira.

Durante enkontru ne’e mós, Prezidente Repúblika ho líder nasionál sira la kontaktu ho Kay Rala Xanana Gusmão via telefone tanba Xefe Estadu konsidera enkontru ne’e ko’alia ba malu oin ba oin.

“Ami hakarak hateten loloos katak ami ko’alia la liuhusi telefone. Ami ko’alia iha fatin ida-ne’e oin ba oin. Maibé, sei iha tempu atu ami ko’alia oin ba oin ho di’ak liután”, nia subliña.

Enkontru ne’e, hala’o durante oras neen, hahú husi tuku 09:00 ramata iha tuku 16:00 otl.

Partisipa iha enkontru refere hosi líder polítiku no personalidade sira mak hanesan eis-Prezidente Repúblika, José Manuel Ramos Horta, eis-Prezidente Repúblika no atuál Primeiru-Ministru, Taur Matan Ruak, eis-Primeiru Ministru I no VII Governu Konstitusionál, Marí Alkatiri, Xefe Estadu Maiór-Jenerál FALINTIL-FDTL, Major-Jeneral Lere Anan Timur, no veteranu Roque Rodrigues.

Entretantu, Eis-Prezidente Repúblika, eis Primeiru-Ministru, Negosiadór Prinsipál ba Fronteira Marítima, Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, la marka prezensa iha enkontru refere.

Jornalista: Cipriano Colo.

Editór: Xisto Freitas

HAKEREK NO HATÁN

Please enter your comment!
Please enter your name here