Prezidente Repúblika, Francisco Guterres Lú Olo, ohin, hala'o reuniaun ho líder istóriku sira, iha Palásiu Prezidente Nicolau Lobato, segunda (10/02/2020). Imajen Tatoli/Egas Cristóvão

DILI, 10 fevereiru 2020 (TATOLI)–Líder istóriku sira kuaze maioria marka prezensa iha diálogu nasionál ne’ebé inisia hosi Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Líder hirak ne’ebé marka prezensa mak hanesan Marí Alkatiri, José Ramos Horta, Taur Matan Ruak, Roque Rodrigues no Lere Anan Timor.  Kay Rala Xanana Gusmão de’it mak la marka prezensa.

Komunikadu ne’ebé fó-sai husi Prezidénsia Repúblika hateten, antes ne’e, Prezidénsia konvida líder polítiku no personalidade sira ba diálogu mak hanesan Kay Rala Xanana Gusmão, eis-Prezidente Repúblika, eis Primeiru-Ministru, Negosiadór Prinsipál ba Fronteira Marítima, Prezidente Partidu Congresso Nacional de Reconstrução de Timor-Leste (CNRT), José Ramos Horta, eis-Prezidente Repúblika; Taur Matan Ruak, eis-Prezidente Repúblika no atuál Primeiru-Ministru, Marí Alkatiri, eis-Primeiru Ministru I no VII Governu Konstitusionál, Xefe Estadu Maiór-Jenerál FALINTIL-FDTL, Majór-Jenerál Lere Anan Timur no Roque Rodrigues, nu’udar veteranu.

Prezidente Repúblika hahú diálogu ho partidu polítiku sira, organizasaun sosiedade sivíl, Igreja Katólika no konfisaun relijioza sira seluk, jurista no personalidade oioin atu buka solusaun ba situasaun polítika-konstitusionál foun ida-ne’e, hafoin Parlamentu Nasional rejeita proposta Orsamentu Jerál Estadu 2020.

Líder polítiku no personalidade na’in-lima ne’e sei tetu hamutuk ho Prezidente Repúblika kona-ba situasaun polítika-konstitusionál ne’ebé nasaun ne’e hasoru ohinloron  no hein katak hamutuk sei hetan dalan ida ne’ebé atende di’akliu ba kestaun polítika no tuir Konstituisaun RDTL haruka, maioria nia hakarak no  situasaun finanseira ne’ebé ohin loron nasaun enfrenta ohinloron tanba laiha Orsamentu Jerál Estadu.

Oras ne’e, Timor-Leste uza de’it Orsamentu Duodésimu atu selu hanesan saláriu, pensaun, bolsa da mãe no seluktan.

Situasaun ida-ne’e ezije vontade polítika, laran nakloke ba malu, liuliu husi líder polítiku sira husi partidu ualu ne’ebé tuur iha Parlamentu Nasionál.

Konstituisaun Repúblika, liuhusi númeru 1, artigu 74, fó kbiit ba Prezidente Repúblika atu kaer metin unidade Estadu nian no  funsionamentu normál instituisaun demokrátika Estadu nian,  hanesan Parlamentu Nasionál no Governu.

Haree ba kbiit ne’e mak Prezidente Repúblika hahú diálogu ho parte hotu-hotu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here