Prezidente APORTIL, Flávio Cardoso Neves. Imajen/António Gonçalves.

DILI, 10 fevereiru 2020 (TATOLI) – Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, informa daudaun kria ona ekipa téknika atu halo verifikasaun ba lista manutensaun ró Nakroma, hafoin selu adisionál ba kompañia Ben Santoso ho montante rihun $59.

“Ha’u kria ona ekipa atu verifika ba invoice orsamentu adisionál ne’ebé hatama husi kompañia Ben Santoso hafoin ita bele halo pagamentu”, Prezidente APORTIL ba Ajénsia TATOLI, iha knaar fatin Portu Dili, ohin.

Prezidente ne’e dehan empreza Ben Santoso hatama ona lista ba sasán ka mákina balun ne’ebé troka ona, maibé presiza verifika kustu hirak ne’e husi APORTIL.

“Ami tenke haree no avalia tanba ita labele fiar de’it ema hodi hasai osan, más ita mós tenke check folin iha invoice ne’e loos mak ita foin selu tanba ita lakohi selu arbiru”, katak.

Hodi dehan haree lista manutensaun ne’e barak mak diferente iha lista reparasaun ne’ebé Diresaun Nasionál Marítima hamutuk ho Biro Klasifikasaun Indonézia halo mak teknikamente ba manutensaun ró ne’e mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

Tanba objetivu Oitavu Governu nia mak Nakroma fila ho kondisaun di’ak hodi hala’o operasaun no asegura vida pasajeiru sira nia.

“Ita-nia ró halo manutensaun majór (boot) tanba troka hotu komponente importante hanesan mákina sentrál (mesin utama) rua no komponente importante balun iha kapitaun nia fatin hanesan, rádiu, kámara no sala kontrola (control room),” afirma.

Nune’e, Flávio Neves dehan hafoin verifikasaun lista ne’e hotu APORTIL hahú hala’o pagamentu ba kustu adisionál ne’ebé kompañia aprezenta.

“Ita sei selu tuir ita-nia kbiit tanba agora ita uza osan duodesimál, entaun ita verifika loos hotu ita bolu sira atu selu faze pur faze”, katak.

Antes ne’e, Ministru Transporte no Komunikasaun, José Agostinho da Silva, dehan tinan kotuk ró ne’e ba halo manutensaun liuliu hadi’a komponente importante sira, ne’ebé agora to’o fali ona iha Timór ho esperansa bele fasilita populasaun halo dezlokasaun liuhusi meiu transportasaun marítima hanesan Ataúro no Oe- Cusse.

Eis Deputadu Bankada KHUNTO ne’e dehan orsamentu inisiál ba manutensaun Nakroma $226.000, más iha adisionál ho montante rihun $59.

“Ohin, ha’u husu lista komponente ne’ebé sira troka, atu ita halo pagamentu bazeia ba faktu reál ho presu hira inklui sasán uzadu, ita tenke haree no hatene atu selu ho transparente”, nia husu.

Iha tinan kotuk, APORTIL kontrata ho kompañia Ben Santoso husi Indonézia halo reparasaun ba ró iha Surabaya-Indonézia iha 30 setembru no fila iha 24 janeiru ne’e.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here