Avansadu Assalam FC, Edit Sávio (9), hamate hela bola ho ulun hafoin pasa hosi nia kolega maibé defeza Karketu, Filipe Oliveira (4) no Domingos Freitas (5) prepara-án atu hadau. Imajen Tatoli/Hortençio Sanchez

DILI, 08 fevereiru 2020 (TATOLI)–Vise-Prezidente Aitana FC, João Samanta hateten, daudaun ne’e, sira halo ona kontaktu ho eis jogadór Aitana Edit Sávio hodi fila hikaas atu reforsa klube refere iha époka ida-ne’e.

“Edit Sávio jogadór ida-ne’ebé mai duni hosi Aitana. Entaun, ami iha ona hanoin para oinsá bele komunika ho nia. Maibé, antes ne’e, ami komunika ona ho nia maibé formalmente atu asina kontratu ne’e mak seidauk,” Samanta ba Agência Tatoli iha kampo Federasaun Futeból Timor-Leste (FFTL), Bairro Formosa, Dili, sábadu ne’e.

Eis treinadór Aitana ne’e dehan, dalaruma atuál jogadór Boavista ne’e fó hela sinál atu fila hikas ba Aitana maibé oinsá mak realiza presiza parte hotu tuur hamutuk atu diskute.

Entretantu, fó hanoin fali, jogadór hosi Munisípiu Lautém ho númeru kamizola 9 ne’e bainhira iha Aitana iha époka primeiru konsege lori Aitana sai kampiaun dahuluk ba Tasa 12 Novembru iha 2015 no jogadór ne’e mós sai hanesan mellór markadór iha tempu ne’ebá.

Hafoin husik Aitana, jogadór refere hala’o fali nia kareira jogadór iha klube Boavista de Timor konsege lori ekipa refere sai kampiaun Liga Futeból Amadora (LFA) époka datoluk nian iha 2018.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here