Nélson Freitas, avansadu Aitana FC

DILI, 08 fevereiru 2020 (TATOLI)–Klube Primeira Divizaun Aitana FC daudaun ne’e preparadu atu kompete iha époka dalimak Liga Futeból Amadora (LFA) ne’ebé sei hala’o iha tempu besik.

Vise-Prezidente Aitana FC, João Samanta hateten sira-nia parte hala’o ona reuniaun no prepara ona jogadór hosi rai-laran no rai-li’ur.

“Ami preparadu. Foin lalais ami estrutura tuur hamutuk haree jogadór balun hosi rai-laran no balun estranjeiru. Jogadór balun mós ami fó impresta ba iha klube seluk maibé balun ami mantein nune’e ami bele hasoru époka ida mai ne’e,” Samanta ba Agência Tatoli iha kampu FFTL, Bairru Formosa, Dili, sábadu ne’e.

Nia dehan, maski klube preparadu maibé sira sei haree no tetu didi’ak saida mak Governu nia planu no polítika ba kontinuasaun LFA agora nian.

Nia relata, jogadór ne’ebé sira prepara ona hosi estranjeiru hamutuk 3 maibé seidauk publika ba públiku no lokál na’in 6 hosi klube seluk ne’ebé iha fuan boot no vontade atu reforsa Aitana bá-oin.

Enkuantu, jogadór anteriór hamutuk 2 ba leten mak sira tenke husik sai bá klube seluk ho razaun katak bele bá kadi di’akliu sira-nia talentu no aprende liután iha Segunda Divizaun nune’e iha futuru Aitana bele bolu fila fali.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here