Polisia Eskuadra Na'in Feto, Dili, kaptura suspeitu na’in liman ne’ebé envolve konfrontasaun iha kapitál Dili. Imajen/PNTL

DILI, 07 fevereiru 2020 (TATOLI)-Komandu Polisia Munisípiu Dili, kinta kalan (06/02/2020), kaptura eis membru Grupu Organizasaun Arte Marsiál (GAM) na’in lima (5) ne’ebé envolve iha konfrontasaun tuda malu ho grupu juventude iha área Terminál Becora, Marcarinhas (UNDIL nia oin) no iha Ai-Tarak-Laran, Dili.

Notísia Relevante : Polísia Halo Apreensaun ba Motór 17 Tanba La Iha Dokumentu

Konfrontasaun ne’e akontese, hafoin juventude lubun ne’ebé identifikadu eis membru grupu GAM fila husi serimónia funerál ba sira nia kolega matebian na’in rua, Sebastião de Maia no Florindo da Costa, ne’ebé mate iha asidente tráfegu, motor ho motór soke malu, iha área Akanunu, Suku Hera, tersa kalan (04/02/2020).

Eis membru GAM na’in lima hanesan, DP, DA, MA, EDSB, MCF polisia kaptura no halo mós apreensaun ba farda organizasaun GAM hanesan, kamiza, kalsa no sintu ne’ebé kontra lei númeru 5/2017 (Arma Branka).

“Konfrontasaun hodi kalan iha Becora no área Ai-Tarak-Laran, parte Palapasu nian, ami detein kedas autór na’in lima husi eis membru GAM iha maioria joven inklui ita halo apreensaun mós ba atributu GAM nian balun,” informa Komandante Polísia Munisípiu Dili, Superintendente Xefe, Armando Monteiro, ohin, ba jornalista sira.

Armando relata katak kronolojia konfrontasaun ne’e akontese tanba eis membru GAM sira la’o grupu hodi hakilar no viva temi organizasaun nian naran hamosu provokasaun iha estrada públiku too mosu tuda malu iha dalan.

Akontesimentu ne’e la rezulta sasán ruma hetan estragu, maibé joven balun iha Becora konsege tuku malu ho eis membru GAM hirak ne’e no parte Polisia Eskuadra Na’in Feto Dili hetan apoiu seguransa husi Batallaun Orden Públiku (BOP) konsege akalma situasaun hodi akompaña eis grupu GAM kontinua viajen too Comoro.

Eis membru GAM sira ne’ebé PNTL kaptura, agora detein hela iha sela polisia hodi hein prosesu investigasaun durante oras 72 para aprezenta ba Ministériu Públiku.

Ba oin, Komandante Armando dehan, parte polisia kontinua halo kontrolu másimu liu husi operasaun auto stop,  kalan-kalan, hodi evita konfrontasaun oi-oin  ne’ebé perturba oden públiku.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here