Vise-Diretór HIAM HEALTH, António Guterres. Imajen Tatoli/Evaristo Soares Martins

DILI, 07 fevereiru 2020 (TATOLI)—Vise-Diretór HIAM HEALTH, António Guterres, hateten organizasaun sosiedade sivíl no Governu tenke esforsu maka’as hadi’a pensamentu povu nian kona-ba ‘han basta bosu”.

“Ita hotu hatene katak problema nutrisaun sai problema ne’ebé aas tanba ita-nia komunidade sira atu konsome aihan ruma “han basta bosu”. Bainhira sira han sente kabun bosu sira sente katak moris ne’e di’ak ona maibé sira la hanoin aihan ne’ebé sira konsome ne’e atu fó valór nutriente saida ba sira, entaun problema ida-ne’e tuir ami-nia haree ita hotu tenke esforsu. Se lae, pensamentu sira ne’ebé komunidade ninia hanoin ne’e ita labele atu rezolve”, nia dehan liuhosi atividade meza redonda ne’ebé organiza hosi The International Republican of Institute (IRI), iha salaun Cruz Vermelha de Timor-Leste (CVTL), Bairro Formosa, Dili, sesta ne’e.

Nia fó hanoin katak ajente Estadu nian presiza orienta komunidade aihan ne’ebé iha nutrisaun di’ak.

Vise-Diretór HIAM HELATH ne’e hateten, komunidade lahatene aihan saida mak nutriente entaun ne’e mós sai dezafiu ida tanba ne’e HIAM HELATH sempre dehan saúde no agrikultura ne’e parte ida-ne’ebé mak labele haketak

“Ortikultura nian ami fó formasaun ba grupu komunidade, ba parseiru sira, ba feto maluk sira ne’ebé hetan violénsia bazeia ba jéneru, sira ne’ebé mak hela iha uma-mahon sira, ami halo atividade hirak-ne’e atu eleva sira-nia koñesimentu no kapasidade para sira bele hatene hili aihan sira ne’ebé nutriente ba família”, nia esplika.

Nia husu deputadu sira bele halo advokásia ba Governu oinsá para bele lori saúde ba suku sira, pesoál saúde sira tenke rútina ba iha komunidade hodi fahe informasaun kona-ba saúde no nutrisaun.

“Ami promove marungi, ami bele halo teste iha Timor maibé ami ba teste iha nasaun seluk. Se ita-nia laboratóriu iha, ita labele gasta osan ba nasaun seluk maibé ita gasta ba ita-nia rai-laran. Ita iha problema rua–primeiru, formasaun saúde ba área rural. Segundu, ita presiza iha laboratóriu nasionál kona-ba aihan ninian. Ami hahú promove ona marungi, ita komesa habai ona marungi nia tahan sai maran no HIAM HEALT prodús ona marungi-uut, ami hakarak importa ba kliente sira”, nia tenik.

Vise-Diretór HIAM HEALTH ne’e hateten, Timor-Leste presiza laboratóriu ida kona-ba teste ba aihan, tanba importa aihan barak mak hosi li’ur, ema importa mai depois hein konsome de’it.

Purtantu, Membru Komisaun F, Deputada Cidália Mesquita Ximenes, konsidera ideia hosi HIAM HEALTH pertinente tebes.

“Ida-ne’e sai preokupasaun ita hotu nian. Ita sei esforsu halo advokásia ho Governu kona-ba hanoin sira-ne’e”, nia tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here