Masin-midar ho marka Pakistaun ne’ebé liu ona prazu.

DILI, 07 fevereiru 2020 (TATOLI) – Diretór Empreza Perissos, James Jong, klarifika katak masin-midar ho marka Pakistaun, ne’ebé liu ona prazu, kompañia la fa’an ona ba públiku dezde outubru tinan kotuk.

“Horisehik AIFAESA mai haree, ami hatudu fatin ne’ebé sasán aat ne’e. Ne’e la fa’an tiha ona, mezmu iha dezembru (2019) nia laran, loron boot, masin-midar ami-nian iha loja ne’e mamuk, sasán aat ne’e mak ami la fa’an sai ba públiku”, James Jong ba TATOLI iha Fatuhada, ohin.

Nune’e, foin iha janeiru ne’e mak masin-midar husi Dubai ho Índia tama ne’e maka fa’an fali ba konsumidór sira.

Diretór empreza ne’e esplika masin-midar ne’ebé troka nia saku ne’e tanba fakar de’it iha rai, nune’e tau iha saku seluk atu rai iha armazein ne’e hodi ba soe.

“Ita risku boot fa’an fali sasán sira aat ne’e, ema hetan moras ruma ita iha responsabilidade boot”, katak.

James Jong salienta troka saku masin-midar ne’ebé liu ona prazu ne’e rai de’it iha armazein, bainhira to’o tempu atu bá soe maka lori bá.

“Tanba masin-midar ne’e (saku) kuak barak, namkari iha rai, laho mós han, ne’e mak tau tiha atu lori bá, tempu seidauk iha tanba janeiru ne’e ami-nia kontentór tama barak, funsionáriu balun lisensa no foin mai, depois AIFAESA mai, bainhira to’o tempu soe iha Tibar mak ami soe hamutuk”, James klarifika.

Nia dehan masin-midar ne’ebé tama iha fulan kotuk ne’e husi Índia kontentór 40 no Dubai kontentór 20 no masin-midar aat ne’e iha saku entre 200 to’o 300.

Sobre produtu aat ne’ebé iha armazein ne’e, James Jong, dehan atu lori bá soe, maibé depende koordenasaun ho Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA).

Entretantu, iha inspesaun ne’ebé AIFAESA halo ba Empreza Perissos, identifika katak kompañia ne’e troka saku masin-midar ne’ebé liu ona prazu.

Nune’e, ekipa AIFAESA deside hodi hapara kedas atu labele fa’an ona ba loja sira ne’ebé sosa, no haruka empreza tau ketak produtu importadu ne’e.

Iha inspesaun dahuluk ne’ebé AIFAESA halo, haree katak produtu ne’e liu ona prazu no halo tiha selajen (segel), maibé inspesaun ne’ebé halo tan (06/02) ba armazein Perissos nian iha Fatuhada, Postu Administrativu Dom Aleixo, Dili, identifika masin-midar ne’ebé empreza rai liu ona prazu, maibé kompañia ne’e troka tiha de’it saku foun hodi nafatin fa’an.

Tanba ne’e, Diretór Departamentu Operasionál, Gabriel da Costa, lamenta tebes ho aktu empreza Perissos nian no konsidera komete krime foun.

“Produtu sira ne’e antes ami-nia ekipa segel ona, maibé ohin ami mai fali halo observasaun ami haree katak sira tau fali de’it produtu ne’e iha karon seluk katak troka de’it karon, maibé produtu ne’e nafatin hela. Hahalok ne’e ami konsidera sira komete krime foun tanba sasán ne’ebé autoridade halo selajen ona labele atu muda sai, bainhira muda tenke informa ba autoridade hodi mai haree”, Gabriel da Costa dehan.

Relasiona ba hahalok ne’e, Gabriel da Costa dehan autoridade foti auto notísia hodi kontra estabelesimentu refere.

Notísia relevante:AIFAESA Identifika Empreza Perissos Troka Saku Masin-Midar Ne’ebé Liu Prazu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here