Fundadora Prontu Atu Serbí (PAS), Maria Dias. Imajen Tatoli/ Evaristo Soares Martins

DILI, 07 fevereiru 2020 (TATOLI)—Fundadora Organizasaun Sosiedade Sivíl Prontu Serbí (PAS), Maria Dias, hateten Planu Estratéjiku Dezenvolvimentu Nasionál (PEDN) mesak furak de’it, maibé tinan 2030 besik ona.

“Ha’u hanoin ita iha planu estratéjia ba 2030 ne’e mehi furak loos, maibé 2030 besik ona. Ita boot sira hanesan deputadu fiskaliza atinjimentu 2011-2015 nian ka lae. Tenke tau ema ho loloos liuhosi ema-nia kapasidade, tenke hatene planu estratéjika ne’ebé mak tau hela ne’e, nia tenke hatene planu asaun hodi hatán no atinje iha 2030 ne’e saida”, fundadora ne’e kestiona liuhosi atividade meza redonda ne’ebé organiza hosi The International Republican of Institute (IRI), iha salaun Cruz Vermelha de Timor-Leste (CVTL), Bairro Formosa, Dili, sesta ne’e.

Fundadora PAS ne’e husu deputadu sira asume funsaun hanesan fiskalizadór fiskaliza buat ne’ebé mak atu to’o iha 2030 ne’e.

Objetivu estratéjiku hotu-hotu ne’ebé iha ona Planu Estratéjiku ba Dezenvolvimentu Timor-Leste nian, nu’udar meta ka objetivu sira hodi atinje rezultadu iha kurtu-prazu, médiu-prazu no longu-prazu mak setór edukasaun no formasaun, saúde no meiu-ambiente.

Nune’e mós, infraestrutura ba estrada no ponte, infraestrutura ba bee no saneamentu, infraestrutura eletrisidade, portu marítimu, aeroportu, telekomunikasaun, agrikultura, apoiu ba atividade petrolífera, turizmu, investimentu, empregu no rendimentu, negósiu estranjeiru sira, diversifikasaun ba ekonomia, eradikasaun pobreza no dezenvolvimentu rurál.

Fundadora Prontu Atu Serbí ne’e husu reprezentante povu sira iha uma-Fukun Parlamentu Nasionál fiskaliza meta ka objetivu hirak-ne’e ninia implementasaun no meta saida mak seidauk atinje.

Hatán ba kestaun ne’e, Membru Komisaun F, Deputadu António Nobre Tilman, rekoñese meta hirak ne’ebé trasa iha Planu Estratéjiku Dezenvolvimentu Nasionál (PEDN).

“Ita iha ambisiozu tuir PEDN, maibé ita labele halo buat hotu dala-ida de’it. Ministériu balun ita tau osan barak, maibé kapasidade ezekusaun mínimu”, Deputadu Bankada Parlamentár KHUNTO ne’e esplika.

Deputadu António Nobre, hateten PEDN hanesan objetivu sentrál Governu nian, Governu sira tutuir-malu iha ona susesu hodi hametin pás no estabilidade sosiál, ne’ebé hanesan kondisaun fundamentál sira ba dezenvolvimentu ekonómiku no ba konstrusaun Estadu Direitu no ba nasaun ida-ne’ebé hotu-hotu hakarak, modernu no prósperu.

Maski nune’e, eziste kestaun endémika rua, ne’ebé mantein kuaze sein alterasaun, no obriga hodi hatán tuir prioridade Governu nian no kompromisu ne’ebé asume ona ho povu iha Planu Estratéjiku Dezenvolvimentu Nasionál (PEDN) no iha Roteiru Implementasaun ba Objetivu sira Dezenvolvimentu Sustentavel (ODS) nian, liuliu nesesidade hodi kombate hamlaha no ki’ak.

Atu kumpre kona-ba meta no objetivu estratéjiku boot sira ne’ebé define husi Planu Estratéjiku Dezenvolvimentu Nasionál (PEDN) no hosi Roteiru Implementasaun Objetivu Dezenvolvimentu Sustentavel (ODS), Governu sei fó atensaun liu kona-ba ninia investimentu, iha setór 3 (tolu) ka área fundamentál sira hanesan dezenvolvimentu kapitál sosiál, dezenvolvimentu ekonómiku no dezenvolvimentu infraestrutura bázika fundamentál sira.

Entretantu, Orsamentu Jerál Estadu (OJE) 2020 mak mantein taxa anuál kreximentu liu pursentu 7.2, konsege hamenus taxa ki’ak nian (ODS 1) menus porsentu 10. 3, konsege hamenus taxa husi dezempregu, hodi kumpre programa Governu nian, ne’ebé prevee kriasaun empregu tinan-tinan 60.000, ho espetativa ida katak to’o iha mandatu nia rohan tinan 2023 bele kria ona empregu 300.000.

Jornalista: Evaristo Soares Martins

Editór: Xisto Freitas

1 KOMENTÁRIU

Leave a Reply to Gilberto Alves Cancel reply

Please enter your comment!
Please enter your name here