Lafaek. Imajen/foti husi google

DILI, 07 fevereiru 2020 (TATOLI)- Ekipa Unidade Polisia Marítima (UPM) ho peskadór inklui família sira, to’o agora seidauk hetan mate isin peskadór Justino Lopes (32) ne’ebé mak lafaek lori lakon iha tasi area  tasi Kuarentena, Tasi Tolu, kinta kalan (06/02/2020), tuku 19:00 Otl.

Komandante Polísia Munisípiu Dili, Superintendente Xefe Armando Monteiro, informa, dezde horikalan too ohin, parte UPM sei buka nafatin mate isin Justino Lopes, nu’udar komunidade  Suku Makili, Postu Atauru, Munisípiu Dili.

Nia dehan, bazeia ba informasaun ne’ebé ekipa investigadór sira hala’o, matebian halo nia atividade peska luku tasi ne’e kleur ona, mas foin primeira vez maka nia enfrenta  dezastre ne’e.

Armando Monteiro  ba jornalista, ohin, hateten polisia koopera ho matebian nia espoza Rita Marçal ho família inklui peskadór sira hodi buka tuir iha área tasi laran ne’ebé matebian hala’o atividade luku no polisia foin hetan de’it vítima nia kalsa inklui kilat tasi no lampu tasi ne’ebé vítima uza.

Iha parte seluk, Rita Marçal nu’udar matebian nia espoza dehan, vítima sai husi uma, tuku 19: 00 Otl, ho objetivu ba luku mas  too kalan boot la fila no família simu informasaun husi nia belun peskadór katak, lafaek mak tata no lori vítima nia isin tama tasi laran.

Antes ne’e sai husi uma, Rita rasik hasé nia kaben atu labele ba halo atividade peska, tanba sente laran todan. Maibé, nia foti nia kilat ho pasta fila kotuk ba de’it tasi.

“Prima ida telefone ba ha’u, dehan Maun Justino Lopes lafaek tata. Ami hotu sai ba buka mas seidauk hetan,” informa Rita Marçal ba parte polisia investigasaun Polisia Dili.

UPM uza ró kontinua buka hodi luku tasi iha área Kuarentena too ba área tasi estátua João Paulo II nian.

Parte polisia mós deskonfia vítima hetan tata husi lafaek ida ne’ebé antes ne’e abandona livre no tata ona labarik ki’ik iha área Tasi besik Portu Tibar nian.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here