Formandu Kursu Promosaun Ofisiál Superiór (KPOS) na’in 37 ne’ebé finaliza ona sira nia ezame ba área servisu investigasaun individuál iha Institutu Defeza Nasionál (IDN). Imajen/IDN

DILI, 07 fevereiru 2020 (TATOLI) – Formandu Kursu Promosaun Ofisiál Superiór (KPOS) na’in 37 ne’ebé finaliza ona sira nia ezame ba área servisu investigasaun individuál iha Institutu Defeza Nasionál (IDN) sei simu graduasaun iha segunda (10/02/2020).

Membru Ofisiál Superiór sira ne’e mai husi Komandu FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL) ho diviza kapitaun na’in 14 husi F-FDTL no Inspetór Xefe 23 husi ofisiál PNTL. Sira hahú kursu KPOS iha  fevereiru 2019 no remata iha 2020.

Diretór Asuntu Akadémiku IDN, Guilherme Soares hateten, liu husi komunikadu imprensa, ohin, katak, membru sira ne’e hala’o ona sira nia aprezentasaun servisu investigasaun individuál ne’ebé sira finaliza ona.

Formandu sira ne’e hetan avaliasaun direita husi ekipa Diresaun Akademia no Ensinu Formasaun (IDN) hodi enkolla alunu na’in tolu hanesan Primeiru Tenente, Duarte Borges Loe (Komponente Navál), Kapitaun de Infantaria, Salustiano de Vasconcelos (Komponente Terrestre) no Inspetór Agostinho Baliada husi PNTL.

Membru sira ne’e hetan avaliasaun liu husi iha aspetu konteúdu servisu no forma halo aprezentasaun no defeza ba sira nia teze.

Tuir oráriu husi IDN, alunu kursu 4º KPOS na’in tolu sei hala’o konferénsia loke ba públiku ne’ebé planu se realiza iha loron 18 Fevereiru iha auditóriu Ministériu Defeza, Fatuhada, Dili, ho tema jerál “Consolidar a Estratégia da Segurança Nacional que Vise Garantir o Desenvolvimento de Timor-Leste”.

Palestra husi oradór 1º maka Tenente Duarte Loe sei hodi tópiku “Reforçar a Segurança Marítima no Ambito do Desenvolvimento da Economia Sustentável”. Nune’e mós palestra husi Oradór Inspetór Xefe Agustinus Baliada sei hato’o  palestra ho tópiku, “O Papel da PNTL na Aplicação da Lei para Prevenir e Atuar Perante Atos de Perturbação da Ordem Pública em Baucau”.

IDN mós konvida ba públiku sira mak hakarak partisipa iha konferensista ne’e bele halo rejista online iha website, www.idn.tl

21 Fevereiru, IDN Realiza Konferénsia Internasionál

Iha parte seluk, Diretór Guilherme informa, iha loron 21 fevereiru, IDN sei realiza serimónia enserramentu ba 4º KPOS no abertura 5º KPOS inklui graduasaun ho programa hanesan entrega sertifikadu, kadeli, prémiu ba melor alunu.

Iha tempu hanesan sei kontinua abertura ba 5º kursu KPOS ho alunu konjunta 40, kompostu husi na’in 20 F-FDTL no na’in 20 mai husi PNTL. Ida ne’e hanesan programa ba parte dadeer nian no iha parte loraik se organiza konferénsia Internasionál nian ho rema “Forging Alliances And Joint Operations in The Indo-Pasific” kontinuasaun husi programa konferénsia IDN nian iha tinan kotuk foka ba Geoestrategia no Geopolitica atuál.

IDN konvida mós oradór ba konferénsia ne’e mak Brigadeiru Jenerál Rory Copinger-Symes, hanesan Diretór Kooperasaun Internasionál USINDOPACOM (US Indo-Pasific Command) no se asina protokolu entre IDN ho Universidade da Paz iha konferénsia ne’e no atividade ne’e sei realiza iha Auditóriu Ministériu Finansas, Dili.

IDN apela mós ba  partisipante sira bele halo rejistu hodi partisipa ba eventu ne’e bele halo iha pájina: www.idn.tl (se atualiza link iha semana oin).

Kontribui ba preparasaun ofisiál sira ho postu Kapitaun ou Primeiru Tenente/Inspetór Xefe ba iha kompeténsia no koñesimentu tékniku militár ba dezempeñu kargu ou funsaun hanesan ofisiál superiór, iha koñesimentu akadémiku atualiza hasoru dezafiu globalizasaun hodi kumpre misaun sira ne’e atribuida, atualiza no uniformiza kompeténsia no koñesimentu tékniku militár/polisiál, konsolida espíritu kamaradajen entre ofisiál F-FDTL no PNTL, kondisaun ba promosaun hodi bele asesu ba postu imediatu no aprende mós lian Portugés tanba durante tinan ida prosesu aprendizajen iha lian Portugés.

Alende ne’e mós sira iha esperiénsia lubun ida, tanba alunu 4º KPOS mós partisipa iha kursu Pos-graduasaun, ba Estudu Estratéjiku Reziliénsia Nasionál ho objetivu otimiza estratéjia ba formasaun avansada kontribui hodi aprofunda metodolojia no kompeténsia iha analiza iha ámbitu estudu estratéjiku.

Programa ne’e atu promove sensibiliza no formasaun ba kuadru superiór husi estrutura estadu, sosiedade sivíl, no elementu potensiál hodi dezempeñu relevante funsaun iha futuru no bele hatene mós kona-ba kontestu jeopolítika no jeoestratéjia, komentarista koñesimentu sientífiku no instrumentu analiza, metodolojia hodi avalia no toma sedisaun hodi hasoru dezafiu sira ne’ebé eskuadra iha seguransa internasionál husi defeza no seguransa nian, kooperasaun internasionál, globalizasaun, relasaun podér mundiál, prosesu desizaun estratéjika no eskuadra mós iha defeza e seguransa nasionál.

Nia hatutan, formasaun 4º KPOS finaliza ho susesu tanba IDN hetan apoiu husi Governu, Parlamentu Nasionál, Ministériu Defeza, F-FDTL, PNTL, Presidente Repúblika, UNTL, UNPAZ no Timor-Telecom. No halo parseiria mós ho Instituto Universitário Militar (IUM) Portugál no Instituto Superior Ciência Sociais e Politicas (ISCSP) Universidade de Lisboa.

Formasaun sira ne’e hotu eskuadra iha estatutu IDN nian iha dekretu Lei no 12/2010 de 26 de Agosto define misaun IDN nian hanesan IDN nu’udar órgaun tutela husi Membru Governu ho kompeténsia iha matéria Defeza no Seguransa Nasionál, kompeténsia hala’o estudu, investigasaun no hanorin matéria kona-ba Defeza no Seguransa Nasionál.

Formasaun ba ofisiál F-FDTL no PNTL eskuadra iha Estatutu Militár husi F-FDTL liu husi Dekretu Lei n.º 7/2014, de 12 de março, alteradu ba Decreto-Lei n.º 28/2016, de 13 de julho, no liu husi Regime de Promoção da PNTL, aprovado husi Decreto-Lei n.º 16/2009, 18 de março.

No enquadramentu Estatuto dos Militares das F-FDTL, aprovado husi Decreto-Lei n.º 7/2014, de 12 de março, alteradu husi Decreto-Lei n.º 28/2016, de 13 de julho, no husi Regime de Promoção da PNTL, aprovado husi Decreto-Lei n.º 16/2009, 18 de março. Decreto Lei sira ne’e hanesan baze Legál hodi IDN bele halo nia atividade de formasaun sira ne’e hotu.

IDN hein ho esperansa, bainhira alunu 4º KPOS fila, sei kontribui sira nia koñesimentu no matenek durante hetan iha IDN, ba sira ida-idak nia instituisaun, liu husi servisu ne’ebé sira nia instituisaun sei fó ba sira.

Jornalista : Eugénio Pereira

Editór       : Francisco Simões