Estrutura ADA/IPDC Na’in Sanulu Simu Pose. Imajen: Nelia Fernandes

DILI, 07 fevereiru 2020 (TATOLI)- Sekretáriu Jerál (Sekjer), Federasaun Desportu Akadémiku Timor-Leste (FDATL), ohin, fó pose ba estrutura Asosiasaun Desportu Akadémiku (ADA) Instituto Professional de Canossa (IPDC) hamutuk na’in 10 ba períodu 2020, ho tema asegura no haburas talentu estudante hodi partisipa ba dezenvolvimentu desportiva Timor-Leste.

Magnífika Reitora IPDC, Ervinia Martins Brito sente haksolok tanba, tuir nia, ida ne’e okaziaun di’ak, momentu oportunu tebes ba IPDC bele hetan konfiansa ne’e hodi hala’o tomada pose iha loron ohin. Ba sá baibain ita hanoin Ensinu Superiór sira preokupa de’it ba parte akadémiku ninian maibé ita haluha tiha parte importante mós ba desportu ninian.

Tanba ne’e, lori IPDC nia naran, estrutura tomak, estudante sira-nia naran hakarak agradese ba oportunidade ida ne’e para atividade sira ne’ebé, ita sei hala’o liliu ba estrutura foun.

“Hein katak hothotu bele la’o ho vizaun ida ne’ebé husi estrutura leten sei hatun mai, apar ho serbisu hamutuk bele koopera hamutuk. IPDC hanoin ona ba oin oinsá suporta nafatin atividade sira ne’e,” Magnifiku Reitora IPDC, Ervinia Martins Brito liuhusi diskursu iha serimónia tomada pose ba estrutura asosiasaun desportu akadémiku foun ba tinan akadémiku 2020, iha IPDC, ohin.

“Ami hein katak hahú oin ba oin, bele serbisu hamutuk kooperasaun di’ak, hamutuk atividade sira ne’ebé la’o di’ak liután, eventu importante sira nasaun ninian para halo estudante hotu bele involve iha laran,” nia akresenta.

Iha fatin hanesan, Sekjer FDATL, Ricardo da Costa Ribeiro, hateten katak desportu ne’e tenke rilex, labele presionadu para depois ita nunka atinji ita-nia Objetivu.

Nune’e, nia esplika, FDATL estabelese husi Universidade Nacional Timor Lorosa’e (UNTL) no ensinu superiór privadu sira inklui IPDC. Tanba sá funda ida ne’e, tanba tinan-tinan kuandu atividade rejionál ita nian iha Timor-Leste kuandu atu partisipa sira, sempre SEJD (Sekretáriu Estadu Juventude no Desportu) sempre delega de’it UNTL mak ba.

Ho razaun ida ne’e, tuir nia, sira tuur hamutuk ho entidade relevante hodi envolve mós ensinu superiór sira seluk iha Timor-Leste.

“Razaun saida maka tenke harii asosiasaun akadémiku kada instituisaun idaidak tanba priense rekezitu ida atu ba kongresu tenke iha adat, asosiasaun kada universidad e tenke iha para iha asosiasaun nia laran iha modalidade hira, bele iha basket, volley, footsall, tenis meza no seluk. Maibé, tenke iha uluk lai asosiasaun nível universidade ka institutu ne’ebé iha para depois bele ba partisipa kongresu. Objetivu atu halo kompetisaun iha nivel nasionál, nivel rejionál no nivel internasionál”.

Nia dehan, FDATL mós sai ona membru ba ASEAN, Sport Council ba ASEAN ninian no mós sai ona membru ba ASIA. Nune’e kualker atividade desportu iha nível rejionál ita mós partisipa. “Neste momento iha ona planu ida oinsá maka ita bele tama iha CPLP. Programa ne’e ita sei mehi hela maibé iha fulan jullu mai, enkuantu iha atividade jogu entre CPLP ne’ebé Timor-Leste mós sai uma na’in, ita atu aproveita tama mós sai ko’alia aprosimasaun ho sira para depois ita bele sai membru mós ba ida ne’e”.

Ho tomada pose ne’e, nia fiar estrutura ne’ebé pose ne’e bele reprezenta IPDC, ba tur iha federasaun desportu akadémiku para bele halo planu, estratezia di’ak no kontinuidade. “Ita labele husik hela buat ne’ebá, iha universidade estatal nian mak bele domina maibé universidade privada mós iha kapasidade, kualidade, para bele mós asume responsabilidade ne’e”.

Iha biban hanesaan, Prezidente Asosiasaun Desportu Akadémika Canossa hanesan mós Vise-Reitór Asuntu Estudantil, Jaimé da Costa Lobo Soares dehan, ho atividade ekstra-kurrikulár liliu atividade desportiva bele minimiza tensaun no iha tempu hanesan atividade desportiva mós atu hatuur konsiénsia ho maluk sira nian para bele hamosu lasu amizade no fraternidade .

“Husi parte institutu-nia ami konsidera nafatin atu hatuur atividade desportiva hanesan atividade importante, la’ós atividade desportiva de’it maib, ami iha atividade ida naran kompeténsia siénsia para oinsé asegura sira-nia koñesimentu ou abilidade sira nian iha estudu ne’ebé sira hala’o sira-nia estudu ba”.

Tuir nia, ba futuru tenta serbisu hamutuk ho federasaun, para oinsá buka dalan ba fó formasaun kona-ba profesionalidade hanesan ema atleta ida.

“Segundu programa, ko’alia kona-ba kapasitasaun, daudaun ne’e IPDC iha treinadór iha arbitu. Maibé, trainadór ho arbitu ida ne’ebé hatudu de’it ne’e. Terseiru ami tenta atu hadi’a ami-nia sistema jogu ami-nia IPDC CUP, parese iha tan volleyball, basketball, xadres, ami tenta atu estabelese tan modalidade hirak ne’e. Futuru ami tenta atu hadi’a kondisaun sira ne’ebé dala ruma presiza atu hadi’a”.

Entretantu, serimónia tomada pose estrutura Asosiasaun Desportiva Akadémiku IPDC ba períodu 2020, partisipa husi Magnífika Reitora IPDC, Me. Ermina Martins Brito, Sekjer FDATL no estudante sira.

Notísia relevante:IPDC Entrega Sertifikadu Ba Estudante Kursu Lian Mandarin

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here