Atividade diskusaun meza redonda ne'ebé organiza hosi IRI, iha salaun CVTL, Bairro Formosa, Dili. Imajen Tatoli/ Evaristo Soares Martins

DILI, 07 fevereiru 2020 (TATOLI)—IRI organiza atividade diskusaun meza redonda hodi haforsa jestaun no fasilidade atu hasa’e dezempeñu serbisu iha área saúde nian.

Organizasaun Sosiedade sivíl hirak ne’ebé partisipa iha meza redonda ne’e mak hanesan Healt Alliance International (HAI), PRADET, STRELA PLUS, Cruz Vermelha de Timor-Leste (CVTL), Hiam Healt, Raes Hadomi Timor-Oan (RHTO), Bairro-Pité Clinic, Marie Stopes International in Timor-Leste, Klínika Prontu Atu Serbí (PAS) no Fundasaun CODIVA.

Atividade diskusaun meza redonda ne’e partisipa hosi sosiedade sivíl no deputadu sira ho tema “Haforsa Jestaun Ajente no Fasilidade Saúde atu Hasa’e Dezempeñu Serbisu Área Saúde nian”.

Atividade diskusaun meza redonda iha área saúde ne’ebé organiza hosi The International Republican Institute (IRI) no apoia hosi USAID ne’e ho objetivu fó oportunidade ba organizasaun sosiedade sivíl sira atu hato’o sira-nia hanoin relasiona serbisu advokásia ne’ebé sira hala’o iha asuntu espesífiku edukasaun nian ba deputadu sira, liuliu deputadu sira hosi Komisaun Espesializada F (Saúde no Edukasaun).

Fundadora no Diretora Organizasaun Sosiedade Sivíl Prontu Serbí (PAS), Maria Dias, hateten PAS durante ne’e haree ba saúde jerál hanesan programa saúde iha família.

Fundadora PAS ne’e mós agradese ba Doutór Rui Maria de Araújo, ne’ebé trasa planu ne’e, tanba konsege deteta moras ne’ebé família idak-idak enfrenta iha sosiedade.

Maibé, nia dehan, programa saúde atu la’o di’ak tenke iha bee-moos, estrada no nesesidade bázika sira seluk tenke di’ak.

“Ita ko’alia kona-ba estrada, bee, atubele fasilita saúde ne’e bele la’o di’ak tanba serbisu integradu ne’e mak menus liu. Se ne’e menus oinsá mak ita bele haforsa jestaun ajente no fasilidade saúde atu hasa’e dezempeñu serbisu área saúde nian, tanba ne’e presiza hadi’a burokrasia no presiza reforsa di’ak liután jestaun iha área saúde nian”, Maria Dias dehan liuhosi meza redonda ne’ebé organiza hosi IRI, iha salaun CVTL, Bairro Formosa, Dili, sesta ne’e.

Fundadora PAS ne’e afirma, laiha serbisu integradu susar atu atinje Planu Estratéjiku Dezenvolvimentu Nasionál (PEDN) iha 2030.

Vise-Diretór HIAM HEALTH, António Guterres, hateten iha meza redonda ne’e katak problema má-nutrisaun lori tinan barak ona no hala’o soru-mutuk dala barak ona maibé laiha solusaun.

Tanba ne’e, nia husu ba deputadu sira halo advokásia ba Governu nune’e tau atensaun sériu ba problema má-nutrisaun ne’e.

“Ami vizita munisípiu sira hodi fó formasaun saúde. Formasaun saúde ne’ebé ami hala’o kona-ba saúde en-jerál ba moras ne’e barak liu mosu iha Timor. Ami fó formasaun kona-ba ai-han nutriente. Ami-nia haree formasaun saúde ne’e importante tebes oinsá ita eleva koñesimentu komunidade para bele prevene moras iha sira-nia família”, nia subliña.

Purtantu, Reprezentante Raes Hadomi Timor-Oan (RHTO), Floriana da Silva, hateten burokrasia iha atentedimentu iha saúde sai problema boot.

“Ema ho defisiénsia atu asesu ba iha sentru saúde maibé pesoál saúde sira ladún atende ema defisiénsia ho di’ak. Dalabarak ita ko’alia kona-ba inkluzaun maibé seidauk inkluzaun ne’ebé mak loloos. Ida-ne’e mak RHTO hasoru iha sentru saúde”, nia hato’o lamentasaun ne’e liuhosi meza redonda ne’e.

Reprezentante RHTO husu husu deputadu sira presiza fiskaliza atendimentu sentru saúde sira kona-ba atendimentu ba ema ho defisiénsia sira.

Entretantu, Koordenadora Programa PRADET, Luisa Marçal, hateten pesoál saúde sira presiza komprende no konsidera ema-nia problema.

“Ami mós fó formasaun ba pesoál saúde bele rekoñese no konsidera ema ne’e-nia problema, tanba ita-nia problema mak edukasaun ba ema idak-idak seidauk forte, intermu ema fó asistente diferente, komunikasaun sei sai nafatin problema, atendimentu la dignu ba ema defisiensia”, nia tenik.

Hatán ba kestaun hirak ne’e, membru Komisaun F, António Nobre Tilman konsidera hanoin hirak-ne’e pertinente tanba sai mós preokupasaun reprezenatnte povu sira iha Uma-Fukun Parlamentu Naisonál.

“Ami mós hetan problema sira-ne’e iha área remota. Dalaruma ita-nia pesoál sira la bá iha ne’ebá. Dalaruma mós iha sentru saúde sira laiha bee-moos no saneamentu iha baze. Ami simu hanoin sira-ne’e, ami nota nune’e ami levante iha plenária no mós bele apár ho planu ministériu nian”, nia katak.

Jerente Seniór Programa IRI, Karlito Nunues, dehan atividade meza redonda hala’o ho intensaun sosiedade sivíl sira bele hato’o preokupasaun kona-ba serbisu sira-ne’ebé relasaun iha área saúde nian.

“Sosiedade sivíl sira bele hato’o preokupasaun kona-ba problema sira ne’ebé durante ne’e komunidade hasoru iha baze hodi bele buka solusaun ba problema sira-ne’e”, nia tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here