ohin,sexta 7/02/20 ADT realiza semináriu munisipal ho tema"dezenvolve Administrasaun suku hanesan xave ba dezenvolvimentu nasionál iha salaun Eskola Sekúndaria Dom Basilio Laclubar. Imajen Tatoli/ Nelson Sousa

LACLUBAR, 07 fevereiru 2020 (TATOLI)-Asosiasaun Hadomi Timor (AHT) sexta ohin, realiza semináriu munisipál ida ba Autoridade Lokál no Konsellu Suku iha Postu Administrativu Laclubar, Munisípiu Manatuto ho topiku ‘Dezenvolve administrasaun suku hanesan xave ba dezenvolvimentu nasionál’.

Oradór Prinsipál iha semináriu ne’e maka hanesan Diretór Nasionál Ministériu Administrasaun Estatál (MAE), Egas Caetano kona-ba polítika Governu da-ualu ba dezenvolve administrasaun suku no polítika dezentralizasaun administrasaun munisípiu.

Oradór daruak, aprezenta hosi Diretór Asosiasaun Hadomi Timor, Manuel Boavida Hornai Soares, ho tema kona-ba papel sosiedade sivíl ba konstrusaun estadu.

Notísia Relevante :AHT fó Formasaun ba Autoridade Lokál Kona-ba Administrasaun Suku

No mós  Reprezentante Sosiedade sivíl, Manuel Pinto ho topiku kona-ba impaktu administrasaun ba dezenvolvimentu nasionál.

Ikusliu, Eis Prezidente Repúblika, José Ramos Horta, hatoo aprezentasaun kona-ba situasaun polítika rai-laran.

Diretór AHT, Manuel Boavida Hornai Soares hateten, objetivu hosi semináriu ne’e atu halibur ideia hosi baze no fahe experénsia hosi peritu nasionál sira kona-ba dezenvolve administrasaun suku, polítika  governu konstituisionál da-ualu, no papel sosiedade sivíl iha komunidade nia le’et.

“Semináriu ne’e hanesan parte ida hosi atividade asosiasaun nian liuhosi programa dezenvolve administrasaun suku ho formasaun ne’ebé  konklui ona ohin bele fó sai fali rekomendasaun sira durante hetan iha suku sira oinsá ba oin bele hadia liután,”dehan,Diretór AHT ne’e ba Ajénsia TATOLI,Ohin.

Oradór Manuel Pinto, iha ninia aprezentasaun hateten persiza promove governasaun di’ak iha suku liuhosi implementasaun lei sira ho rigór, kapasita rekursu umanu no apoiu finanseiru hodi hala’o dezenvolvimentu iha suku sira.

Entretantu, semináriu ne’e partisipa hosi  Segundu Komandante Polisia Nasionál Timor Leste (PNTL) Munisípiu Manatuto,Autoridade Lokál  no komunidade iha Postu Administrativu Laclubar.

Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here