IADE

DILI, 07 fevereiru 2020 (TATOLI)- Embaixadór Canada Canada Cameron Mackay, oferese sertifikadu ba Formandu hamutuk 40 husi Ministériu Negósiu Estranjeiru no Kooperasaun (MNEK) no Gabinete Primeiru-Ministru (GPM), ne’ebé ramata ona formasaun kona-ba diplomasia, kestaun komunikasaun diplomátika, negosiasaun, protokolu no boa governasaun.

“Formasaun ne’e Canada halo ho Governu Timor-Leste,” Koordenadór ba Estudu Institutu Diplomata (IED), Aurélio Guterres informa ba jornalista sira hafoin entrega sertifikadu ba formandu 40 ne’e iha IED, Praia dos Coqueiros, Dili, sesta lorokraik ne’e.

Tuir koordenadór ne’e katak benefísiu ne’e konsentra liu ba abilidade funsionáriu sira nian. “Ninia konsentrasaun ne’e foka liubá abilidade oinsá maka sai lideransa, jere halo diplomasia, serbisu protokolár, ne’ebé konsentra liu ba iha abilidade funsionáriu sira nian,”haktuir Profesór Aurélio.

Iha biban hanesan, Embaixadór dezignasaun Canada, Cameron Mackay informa Canada ho Timor-Leste (TL) hakarak futuru ne’ebé maka di’ak liu hosi servisu públiku.

“Ha’u sente Canada ho Timor-Leste hakarak futuru ne’ebé di’ak, tanba ne’e  fatór importante ida ba futuru  di’ak maka uainhira iha servisu públiku ne’ebé maka forte, servisu públiku ne’ebé bele prepara posibilidade konsellu ba ita-nia lider demokrátiku ne’ebé maka iha tiha ona no  implementa konsellu sira ne’e ho efetivu no efisiensia,” diplomata canadiano ne’e hateten.

Nune’e, nia realsa tan katak ho formasaun ne’ebé oferese hosi Canada ne’e rasik ajuda sira atinje sira-nia mehi. “Ami-nia treinu semana ida ne’e kona-ba diplomasia no governasaun atu ajuda ami atinje ami-nia mehi,” tenik Embaixador Canada ne’e.

Nia mós akresenta katak Canada ho TL iha relasaun ida ne’ebé di’ak tebes, hosi tempu difisil to’o ONU (Organizasaun Nasaun Unida) nia tempu no to’o agora, nune’e Canada sei continua mantein relasaun ne’ebé di’ak iha futuru.

“Tinan barak Canada oferese dezenvolvimentu kooperasaun ba Timor-Leste, hafoin  Timor-Leste independénsia ami-nia kooperasaun dezenvolvimentu foka liu ba agrukultura no agora ami-nia kooperasaun foka liu ba direitu umanu, ambiente, previzaun tempu, no importante liu iha igualidade jenéru. Ami oferese treinamentu sira ne’e iha tihan hira ne’e no ami sei kontinua oferese nafatin treinamentu sira ne’e iha future,” diplomata ne’e kompromete.

Enkuantu, Formandu Apolináriu Leite nu’udar Ofisiál Polítika ba WTO (World Trades Organization) no LDC iha MNEK konsidera formasaun ne’e importante tebes ba funsionáriu sira hosi MNEK tanba iha relasaun ho serbisu lorloron tanba ne’e nia hein katak  Governu Canada kontinua fó nafatin formasaun refere.

“Tanba ita hatene katak ita-nia rai Timor-Leste seidauk iha institute diplomásia ne’ebé maka ho kualidade akadémiku ho nivél mestradu tanba ne’e ida ne’e importante tebes, tanba ita tenke aprende hosi nasaun sira hanesan Canada, para oinsá ita bele implementa fali sistema no estrétejia maka sira fó mai ita,” nia dehan.

Alende ne’e funsionáriu MNEK ne’e realsa liután katak formasaun ne’e di’ak tanba bele prepara mós rekursu oinsá atu defende no promove setór privadu sira.

“Governu Timor-Leste agora serbisu makas atu Timor-Leste bele tama ba membru ASEAN no WTO nune’e ho formasaun ne’e bele fasilita tebes uainhira Timor-Leste tama ba ASEAN no WTO ita iha ona rekursu di’ak para oinsá bele defende ita-nia interrese uainhira tama iha trade no oinsá bele promove setór privadu no habelar ba rai li’ur, tanba ne’e maske loron tolu de’it tuir formasaun kuandu ita aproveita di’ak benefisiu bo’ot tebes.” Nia hateten.

Notísia relevante:IED Kontinua Koopera Ho Embaixada Canada Fó Formasaun Ba Diplomata Sira

Jornalista: Nelia Borges

Editór     : Rafy Belo