Xefe Estadu FALINTIL-Forsa Defeza Timor-Leste (F-FDTL), Maiór Jenerál Lere Anan Timur, ba jornalista sira iha Palásiu Prezidensiál Nicolau Lobato Bairru Pité, kuarta, (27/2/2019). Imajen António Gonçalves

DILI, 07 fevereiru 2020 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba líder nasionál sira atu marka prezensa iha diálogu nasionál ne’ebé konvoka husi Prezidente Repúblika, Francisco Guterres Lú Olo, ne’ebé tuir planu sei realiza iha 10 fevereiru tinan ne’e, iha Palásiu Prezidente Nicolau Lobato, Bairru Pité, Dili, ohin. 

“Tuir ajenda ne’ebé fó-sai ona husi Prezidente Repúblika katak sei hala’o diálogu iha 10 fevereiru, inklui mós ha’u. Tuir loloos, ha’u la presiza marka prezensa, maibé tanba ha’u responsabiliza kona-ba siguransa no defeza, no ha’u mai atu hato’o mós ha’u-nia pareser. Ita husu atu sira na’in-lima ne’e tenke marka prezensa. Bainhira hotu-hotu marka prezensa, ida-ne’e mak dehan konsensu, no ita sei bele halo buat ruma hodi ultrapasa impase polítika ida-ne’e”, Lere hateten lia hirak-ne’e, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Lere fiar katak líder istóriku sira nunka hakarak nasaun ka povu ninia aat, maibé sira hakarak nasaun no povu ninia di’ak.

“Maibe, atu to’o ida-ne’e presiza konsensu. Bainhira laiha konsensu ita la rezolve buat ida. Krize ne’ebé Timor atravesa la’ós dala ida ka rua de’it. Krize hahú kedas husi 1975, 1984 to’o krize 2006 laiha solusaun. Sé mak sala, no sé mak loos ita la hatene. Ita hanoin katak hanesan ko’ak ida karik ita haksoit liu de’it, ita hakatliu ka ultrapasa de’it. Maibé, ku’ak ne’e iha nafatin. Tanba ne’e, agora krize polítika ne’ebé mak ita moris daudaun ne’e, ita tenke hatene, ida-ne’ebé mak loos no ida-ne’ebé mak sala”, nia subliña.

Entretantu, ajenda ne’ebé fó sai husi Prezidénsia Repúblika, Prezidente konvida ona líder nasionál sira kompostu husi líder istóriku no personalidade sira mak hanesan Eis-Prezidente Repúblika, Eis-Primeiru-Ministru Kay Rala Xanana Gusmão, Eis-Prezidente José Ramos Horta, Eis-Prezidente no atuál Primeiru-Ministru, Taur Matan Ruak, Eis-Primeiru Ministru Marí Alkatiri, Xefe Estadu Maiór-Jenerál F-FDTL, Majór-Jenerál Lere Anan Timur no veteranu Roque Rodrigues.

Komunikadu ne’ebé antes ne’e fó sai husi prezidénsia Repúblika hateten, hamutuk ho líder no personalidade hirak-ne’e, Xefe Estadu sei “halo análize no identifika opsaun sira ne’ebé di’akliu hodi hadi’a situasaun polítika-konstitusionál atuál”.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here