Frangu ne'ebé liu ona prazu ka estragadu iha loja Lucky Market, Audian, Sexta (07/02/2020). Imajen TATOLI/Antónia Gusmão.

DILI, 07 fevereiru 2020 (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) liuhusi inspesaun ba estabelesimentu Lucky Market identifika frangu no hemun sira liu ona prazu ka estragadu.

Diretór Serbisu Opresaun AIFAESA, Gabriel da Costa, hateten tuir loloos produtu sira ne’ebé liu ona prazu labele tau nafatin iha armazein no tenke lori ba soe.

“Ami mai halo inspesaun bá iha loja distribuidór, no ohin mai iha kompañia Lucky Market, iha ami-nia inspesaun ne’e hetan sira-nia produtu balu ninia data validade ne’e iha dezembru 2019”, Gabriel da Costa afirma iha armazein Lucky Market, Audian, ohin.

“Ami halo konfirmasaun ho empreza katak ayam potong sira ne’e aat, tanba ahi ou eletrisidade maka enerjia forte no limitasaun ba kontentór, tan ne’e produtu sira ne’e estraga no labele fa’an ba konsumidór. Ami mós hetan produtu sira hanesan hemun ho marka Sunkist kaixa 20 no hemun sira seluk”, Gabriel dehan.

Nia esplika sasán estragadu no liu prazu tenke hasai ba destroi, maibé realidade sira tau nafatin iha armazein no piór liu sasán sira ne’e tau hamutuk ho sasán sira ne’ebé di’ak, ne’e tuir loloos labele akontese.

AIFAESA konsidera empreza Lucky Market komete infrasaun rua; ida mak produtu estragadu multa ki’ik liu maka rihun $1, no boot liu maka rihun $10, no kona-ba produtu liu prazu mínimu rihun $1 to’o rihun $5. Multa sira ne’e bazeia ba dekretu lei 23/2009, 5 agostu iha artigu 13 aliña a no b kona-ba rejime infrasaun administrativa kontra ekonomia no seguransa alimentár.

Relasiona ba akontesimentu refere, ekipa AIFAESA halo apreensaun ba produtu sira ne’e no aplika auto notísia ba empreza.

Maske nune’e, AIFAESA foti de’it produtu liu prazu ida hodi sai hanesan amostra no seluk halo selajen de’it iha armazein empreza nian tanba AIFAESA rasik laiha armazein.

Entretantu frangu ne’ebé estragada no liu prazu hamutuk konjeladór ha’at, hemun kaixa 20-resin.

Notísia relevante :AIFAESA Identifika Empreza Perissos Troka Saku Masin-Midar Ne’ebé Liu Prazu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here