Diretór Ezekutivu SERVE,IP, Florêncio Sanches. Imajen/Tatoli.

DILI, 06 fevreiru 2020 (TATOLI) – Diretór Servisu Rejistrasaun no Verifikasaun Emprezariál (SERVE), Florêncio Sanches, informa empreza estranjeiru hamutuk tolu maka ameasa kona krize finanseira tanba ho situasaun polítika Timor-Leste nian.

“Iha empreza tolu hosi estranjeiru ne’ebé durante ne’e halo investimentu iha Timor-Leste, mai hasoru ha’u foin daudaun hodi informa katak sira nia empreza durante tinan tolu, hetan de’it rendimentu porsentu 30, ho situasaun sira ne’e, hahú hosi janeiru bá oin, sira labele selu saláriu ba traballadór timoroan sira, selu eletrisidade inklui selu taxa”, nia dehan ba Ajénsia TATOLI, iha Palm Business, Hudi-laran, ohin.

Nia hatete situasaun polítika maka nune’e nafatin, hosi janeiru ba oin, empreza sira hosi Malázia, Singapura no Koreia sei deside atu taka sira-nia negósiu.

“Ha’u fó opsaun ba sira katak labele taka imi-nia atividade negósiu, se bele suspende ka pauza de’it ba imi-nia atividade, imi haruka karta ida ba Governu liuhosi Ministériu Finansa liuliu Autoridade Tributária atu labele selu taxa”, dehan.

Tanba ne’e, empreza hirak ne’ebé balun halo ona investimentu tinan 10-resin iha Timor-Leste, ho kapitál ne’ebé boot no selu taxa tinan-tinan, hosi hirak ne’e, balun halo atividade negósiu iha área otelaria, promove turizmu no konstrusaun.

Kompañia sira ne’e, rua hosi membru ASEAN (Malázia ho Singapura) no ida seluk husi Koreia, tanba ne’e maka emprezáriu sira foti desizaun hapara atividade iha ne’e, bele implika Timor-Leste tama ba ASEAN.

“Ita tenke kuidadu tanba empreza tolu ne’e, rua membru ASEAN hanesan Singapura ninian influénsia makaas tebes, ita agora daudaun esforsu atu tama ba ASEAN, tanba ne’e foti desizaun ne’e tenke kuidadu”, katak.

Entretantu, parte SERVE la fó sai kompañia nia-naran tanba ho étika ne’ebé iha, maske empreza sira ne’e hosi nasaun hirak ne’ebé temi ne’e parseiru di’ak ho Timor-Leste tinan barak ona halo investimentu iha país.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here