Diretór Ezekutivu SERVE, IP, Flornêncio Sanches, hatudu hela sistema SIGAS ne’ebé estabelese, ohin, iha Baucau, Bobonaro no RAEOA. Imajen/Florencio Miranda Ximenes.

DILI, 06 fevereiru 2020 (TATOLI) – Servisu Rejistrasaun no Verifikasaun Emprezariál (SERVE, IP), ohin, lansa Sistema Integradu ba Jestaun no Akizisaun Seguru (SIGAS, sigla portugés) husi Ministériu Finansa (MF) ba munisípiu tolu hanesan Baucau, Bobonaro no Rejiaun Administrativa Espesiál Oe-Cusse Ambeno (RAEOA) atubele hafasil atendimentu ba rejistu komersiál.

“Husu ba públiku liuliu munisípiu tolu ne’e labele mai tan Dili  mak foin rejistu, mas rejistu iha nia munisípiu de’it”, Diretór Ezekutivu SERVE,IP, Florêncio Sanches, dehan hafoin akompaña Ministru Koordenadór Asuntu Ekonómiku (MKAE) internu, Fidelis Manuel Leite Magalhães, iha Hudi-laran, Bairru Pité, ohin.

Diretór Ezekutivu dehan lansamentu SIGAS ne’e hanesan sistema ne’ebé utiliza iha MF atu koleta taxa, maibé atribui ba SERVE ho objetivu atu sidadaun liuliu emprezáriu sira labele gasta tempu no kustu husi munisipiu mai iha Dili ho intensaun halais rejistu hodi bele hala’o atividade ekonómika.

“Ami-nia programa ne’e Governu apoia tebes tanba antes ne’e atividade rejistu empreza ne’e so sidadaun hotu tenke mai rejistu iha Dili”, katak.

Hodi dehan sistema ida ne’e la’ós própriu ba sistema komersiál, maibé ne’e taxa ninian ne’ebé MF atribui ba SERVE. “SERVE hanesan utilizadór sistema hodi fasilita servisu rejistu komersiál ba munisípiu tolu bele halais atendimentu ba públiku”.

Diretór Ezekutivu SERVE dehan SIGAS estabelese ona iha munisípiu haat hanesan Dili (iha antes ona), Baucau no Bobonaro no RAEOA. “Maibé fin tinan ne’e, ita hakarak estabelese tan atu kompleta munisípiu sira ne’ebé la inklui Ermera no Manatuto no Liquiçá tanba sira besik Dili ne’ebé ita estabelese iha tinan oin (2021).

Estabelesimentu SIGAS ne’e tuir dekretu lei númeru 7/2007 iha artigu 4, hateten SERVE,IP tenke loke nia sanak sira iha territóriu tomak atubele atende nesesidade emprezáriu sira no hafasil liután lisensiamentu ba atividade ekonómika sira.

“Ami garante ona katak rejistu no fó lisensiamentu ba emprezáriu no atividade negósiu hotu sei la to’o loron lima, maibé bele foti no liuhusi prosesu 24 oras nia laran”, garante.

MKAE Fidelis Manuel Leite Magalhães, dehan Governu apoia programa SERVE nian tanba nia knaar ne’e importante tebes atu presta servisu ho kualidade no profisionál ba sidadaun sira.

“La’ós atu halo negósiu sai fasil, maibé atu halo ita-nia sidadaun mós sente katak iha Estadu ida ne’ebé responde sira lalais, bainhira sira trata surat ka dokumentu”, katak.

Eis Deputadu Bankada PLP ne’e dehan Oitavu Governu halo ona enkontru dahuluk liuhusi vizita SERVE nia fatin, mas nota katak kualidade rekursu umanu, lojístika no edifísiu presiza hadi’a atu atende sidadaun ho di’ak no SERVE responde ho pozitivu kedan.

Hodi hatete SERVE hanesan ajénsia ne’ebé presta servisu ba sidadaun sira relasiona ba ekonomia ka atividade atu sai ezemplu ba modernizasaun, profisionalizmu no boa governasaun iha Timor-Leste.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here