Ministru Justisa, Manuel Cárceres da Costa. Imajen/Antonio Goncalves

DILI, 06 fevereiru 2020 (TATOLI) – Jurista Timoroan na’in 45, kompostu husi Juiz na’in 15, Defensor Públiku na’in 15 no Prokuradór na’in   15  ne’ebé selesionadu  atu tuir formasaun tinan ne’e la bele realiza no tenke adia fali ba tempu seluk tanba orsamentu atu selu subsídiu sumba tiha ona iha Parlamentu Nasional hamutuk ho Orsamentu Jerál Estadu (OJE) 2020.

Notísia Relevante : Orsamentu Duodesimu ba MJ Milaun $1-resin

Ministru Justisa Manuel da Costa Cárceres, informa, buat hothotu prontu hotu iha Sentru Formasaun Jurídika no Judisiál (SFJJ), liuliu kona-ba loke vaga, matéria no formadór sira, maibé husi duodesimu la bele halo buat ida.

“Ha’u enkontru ona Konsellu Konsultivu Ministru Justisa nian, tuir loloos hahú ona formasaun, maibé ministru dada-is uitoan tanba osan ba programa refere pendente tiha tanba OJE 2020 sumba iha PN,” Ministru Manuel Cárceres informa ba jornalista sira  iha Edifísiu Diresaun Nasional Rejistu Notariadu (DNRN),  tersa (04/02/2020).

Manuel Cárceres mós hateten, kona-ba arrendamentu ne’ebé mak MJ rekolla iha tinan 2019, kuaze hetan milaun $5 ba kofre Estadu, nune’e konsidera hanesan susesu boot ida husi servisu diretór jerál sira, tantu nivel nasionál, nivel munisipál to’o funsionáriu sira.

Husi sorin seluk,  Diretór SFJJ, Antonino Gonçalves informa, atu halo rekrutamentu ba formandu na’in 45 prontu hotu ona, se OJE 2020 mak aprova karik, kursu ne’e hala’o tiha ona iha  fevereiru no marsu ne’e, maibé orsamentu sumba ona iha Parlamentu hodi difikulta buat hothotu.

Jornalista : Domingos Piedade Freitas

Editór      : Francisco Simões

HAKEREK NO HATÁN

Please enter your comment!
Please enter your name here