Ministru Transporte no Komunikasaun, José Agostinho da Silva. Imajen/António Gonçalves.

DILI, 6 fevereiru 2020 (TATOLI)–Ministériu Transporte no Komunikasaun (MTK) uza razaun tolu (3) hodi halo avaliasaun ba funsionáriu kontratadu hamutuk 23.

Hosi funsionáriu kontratadu 23 ne’e, na’in-haat (4) sai ona hosi Ministériu Transporte no Komunikasaun, hela de’it funsionáriu kontratadu na’in-19.

Ho kestaun ne’e, Parlamentu Nasionál (PN) liuhosi Komisaun E (Infraestrutura) hala’o audisaun ho Ministériu Transporte no Komunikasaun (MTK) hodi partilla informasaun kona-ba funsionáriu kontratadu hirak-ne’e.

Ministru Transporte no Komunikasaun, José Agostinho da Silva, hateten razaun fundamentál tolu maka sai hanesan baze hodi avalia funsionáriu kontratadu hirak-ne’e.

Nia esplika, razaun dahuluk maka tenke hatene estatutu sira-ne’e tanba kontratadu entaun sira-nia kontratu expire, la’ós ministériu maka hapara ka hasai maibé kontratu ne’e ninia durasaun tempu ne’e ramata ona iha 31 dezembru 2019.

Bainhira kontratu ne’e ramata ka expire, atu estende fali ka la estende ne’e tenke prosesu ba avaliasaun dezempeñu. Rezultadu avaliasaun dezempeñu ba funsionáriu kontradu ne’e nia valór ne’e di’ak ka ladi’ak entaun ida-ne’e razaun ida para bele estende ka la estende.

Razaun daruak, bazeia nesesidade serbisu iha diresaun sei presiza sira-nia prezensa ka lae. Se nesesidade la presiza ona maski sira-nia rezultadu avaliasaun valór muito bom, bom, sufisiente ka prenxe rekizitu estende maibé nesesidade la presiza ona, prontu komprende sentidu ida kontratadu ne’e.

Razaun datoluk maka haree ba kapasidade finanseira ministériu nian, tanba situasaun atuál no fatuál iha rai-laran liga ba polítika oras ne’e la’o ho orsamentu duodesimál entaun orsamentu ne’ebé maka iha la sufisiente ona para responde ka asegura direitu funsionáriu kontratadu sira.

“Razaun tolu ne’e maka fundamentu atu hatuur desizaun katak ema ne’e estende ka lae. Segundu, nesesidade serbisu. Se nesesidade avaliasaun ne’e prenxe rekizitu duni para estende nia kontratu maibé realidade fatin serbisu labele permite ona nia prezensa iha ne’ebá, ha’u hanoin ne’e mós razaun ida. Terseira razaun mak kapasidade finanseira ne’e”, nia dehan hafoin hala’o audisaun ho Komisaun E (Infraestrutura) iha Parlamentu Nasionál, kinta ne’e.

“Funsionáriu ne’e hamutuk 23 ne’ebé ita la konsege estende, na’in-haat (4) sai ona, iha balun nia rezultadu avaliasaun ne’e sufisiente, mezmuke situasaun hanesan ne’e ita esforsu oinsá armoniza. Ha’u dehan liafuan armoniza ne’e iha sentidu pozitivu”, nia hatutan.

Purtantu, Prezidente Komisaun E (trata asuntu Infraestrutura), Abel Pires, kontente ho razaun Ministru José Agostinho nian kona-ba funsionáriu kontratadu hirak-ne’e.

“Ami kontente ho ministru nia esplikasaun. Funsionáriu kontratadu ne’e kontratu ho termu sertu no ami husu ministru haree filafali funsionáriu sira-nia kondisaun. Balun posibilidade bele estende, tanba ita ko’alia kona-ba serbisu ne’e ema-nia ahi-matan. Ministru ohin hateten ba ami katak sei tetu”, nia esklarese.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here