Ilustrasaun esplorasaun seksuál. Imajen/Ilustrasaun KOMPAS

DILI, 06 fevereiru 2020 (TATOLI) – Audiénsia julgamentu iha Tribunal Distritál Dili (TDD), kuarta (05/02/2020), aprezenta arguido AGL ne’ebé deskonfia komete kazu krime esplorasaun seksuál.

Audiénsia  julgamentu ne’ebé prezide husi Juis Koletivu, Sribuana da Costa, Albertina Neves ho Antonio Helder do Carmo ne’e, Prokuradór titular Renato Bere Nahac, reprezenta Ministériu Públiku, solisita ba TDD atu aplika pena prizaun tinan lima (5) ba arguido AGL tanba fa’an feto ba mane seluk.

Iha alegasaun final, Prokuradór  Renato Bere Nahac, afirma, bainhira  Ministériu Públiku lori akuzasaun ba iha Tribunál atu halo julgamentu bazeia ba faktu ne’ebé iha.

Kazu nee akontese tanba iha indísiu katak lezada husu osan no foos ba iha arguido, depois testemuña husu arguido atu sosa rai no uma, maibé ikus mai mosu oin seluk.

Maske arguido AGL konfesa katak, antes nee lezada husu mane ba arguido tanba osan la iha, nune’e arguido mós deklara katak antes nee mós testemuña nee husu feto ba arguido.

Parte defeza ne’ebé fó asisténsia legal ba arguido AGL husu ba Tribunál atu aplika pena ne’ebé mais adekuadu tanba arguido mós foin primeira vés mai Tribunál.

Rona tiha husi parte rua nee, Tribunál adia julgamentu nee ba iha loron 27 Fevereiru 2020 tuku 4:30 Otl, hodi rona sentensa final.

Tuir akuzasaun husi Ministériu Públiku ne’ebé aprezenta ba Tribunál lee sai katak, iha 24 fevereiru 2016, arguido telefona ba lezada TS ho nia prima NA lori batar ba iha nia uma, tanba nee nia mós lori ba.

Bainhira too iha uma, lezada haree ema mane ida tur iha sala vizita entaun arguido  haruka lezada kaer liman no mane ho inisiál JFC no husu di’ak ka lae.

Bainhira sira tur hela iha sala vizita, lakleur lezada TS ho mane JFC hodi tama iha kuartu laran atu halo relasaun seksuál,
Maibé, iha altura ne’ebá Polisia too kedan halo detensaun ba iha arguido. Tamba arguido lori feto aat ba iha nia uma hodi fa’an ba ema mane sira.

Iha depoimentu arguido AGL katak buat balun loos no balun la loos tanba nia la halo buat hirak ne’e, no la koñese arguido no lezada sira. Nune’e mós tuir testemuña HCB ho GFA nu’udar membru Polisia Nasional Servisu Investigasaun Kriminál (PNSIK) katak arguido prepara nia uma hodi fó ba feto ho mane sira hodi halo relasaun sexual.

Arguido fa’an lezada nee ba mane sira ho “folin” purvolta $50.00 too $100.00. husi rezultadu negósiu ne’e, arguido hetan nia porsentu purvolta $15.00 too iha $20.00.

Arguido hanesan autór material ba krime esplorasaun seksuál ne’ebé previstu iha  artigu 174 númeru 1 katak krime nee nia moldura penal nee tinan tolu  ba leten.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here