Membru PNTL na’in haat (4) ba hala'o misaun pás ONU nian iha Sudaun do Súl. Imajen/Mídia PNTL

DILI, 06 fevereiru 2020 (TATOLI)- Membru Polisia Nasionál Timor-Leste (PNTL) na’in  haat (4)  dezloka ona ba Sudaun do Súl  iha kapitál Juba hodi hola parte iha misaun manutensaun ba pás Organizasaun Nasoins Unidas (ONU) nian.

Notísia Relevante : UEP Na’in 25 Tuir Formasaun ba Misaun Pás ONU

Membru PNTL na’in haat (4) hala’o despedida molok dezloka nasaun Sudaun do Súl iha kapitál Juba hodi hola parte iha misaun pás ONU nian. Imajen/Mídia PNTL

Membru sira ne’e arranka ona ba ONU, hafoin liu teste rekrutamentu ne’ebé hala’o direita husi ONU koopera ho Komandu PNTL.

Membru sira ne’ebé dezloka ona ba rai li’ur iha tersa  (04/02/2020), kompostu husi Inspetór Xefe Mousinho Correia, Inspetór Xefe Maria Fátima, Sarjentu Xefe Guilhermina Santos ho Sarjentu Xefe Ofelino Perreira.

Komandante Jerál PNTL, Komisáriu Faustino da Costa,  husu ba membru sira atu hala’o misaun kumpre regra no regulamentu hotu-hotu hodi hamorin Timor-Leste nia naran iha misaun ONU hodi lori dame iha Sudaun do Súl.

PNTL ninia envolvimentu iha misaun pás ONU ninian mai husi primeiru katak, Timor-Leste sai Estadu membru ba ONU ninian hanesan iha tinan 2002 Timor-Leste nia bandeira harii iha kuartél jerál ONU.

“Prosesu sira ne’e hotu to’o iha tinan 2005, PNTL ninia ema na’in 10 envolve iha misaun pás ONU ninian iha Kosovo, hala’o mós iha rai Guinea Bissau, hahú ho ema na’in lima, ema na’in rua, ema na’in tolu no ikus liu membru na’in ida mak remata iha 2016,” informa Komisáriu Faustino da Costa, liu husi komunikadu imprensa ne’ebé Ajénsia TATOLI asesu, ohin.

Partisipasaun membru PNTL ba iha misaun pás ida ne’e primeiru tanba ONU dekreta rezolusaun ida ema hanaran UN Resolution 24-03-2015 hodi fó dalan no loke katak Sudaun do Súl presiza intervensaun no apoiu husi ONU.

Iha fatin hanesan, Inspetór Xefe Mousinho Correia ne’ebé maka sai hanesan xefe ekipa PNTL nian ba misaun  ne’e dehan, prontu atu hamorin PNTL ho nasaun Timor-Leste nia naran iha misaun ONU.

Mousinho sente orgullu tebes hodi hetan  konfiansa atu hala’o knaar ho responsabilidade ida ne’ebé boot ba sira hodi lori PNTL nia naran no Timor-Leste nia naran  iha mundu internasionál.

Inspetór Xefe ne’e afirma tan, durasaun ba misaun ne’e rasik maka naturalmente sira fó tinan ida maibé bele mós fó estensaun to’o tinan rua no informasaun ne’ebé sira iha kona-ba fatin ne’ebé koloka ba mak iha kapitál Juba nasaun Sudaun do Súl.

Parseiru Timor-Leste Police Development Program (TLPDP) maka oferese fardamentu no formasaun ba membru PNTL na’in haat  ne’ebé selesionadu no sira sei hamutuk ho membru polisia husi nasaun 17 ba misaun pás ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here