Husi karuk ba loos, Komandante Lere Anan Timur, Mari Alkatiri, Francisco Guterres Lú Olo, Taur Matan Ruak, ho Kay Rala Xanana Gusmão, partisipa serimónia kulturál iha Masakre Craras, Viqueque. Imajen/Eugénio Pereira

DILI, 06 fevereiru 2020 (TATOLI)–Movimentu Asukai Lorosa’e (MAL), aprezenta substánsia tolu husi diálogu nasionál ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin. 

Portavóz MAL, Rosito Guterres sita substánsia tolu ne’e maka hanesan, nu’udár sosiedade ida, MAL hakarak atu ema hotu fó apoiu tomak ba Prezidente Repúblika hodi bele aposta solusaun ida di’ak ba situasaun polítika, sosiál no ekonomia nasaun nian.

Segundu, MAL sujere ba Prezidente Repúblika katak, atu hakotu impase polítika ida-ne’e, dalan ida di’akliu hosi opsaun hotu-hotu maka diálogu entre líder istóriku sira, hamosu konjuntura polítika nasionál foun ba Timor-Leste foun no di’akliu ba lema Repúblika Demokrátika Timor-Leste “Unidade, Asaun no Progressu “.

Terseiru, dalan diálogu ne’ebé Prezidente Repúblika inisia ne’e lejítimu, tanba ne’e MAL ho fiar metin katak rezultadu diálogu ne’e bele hamosu desizaun Prezidente Repúblika, atu harii Governu ida-ne’ebé sustentável ho postura kualifikada no inkluziva ho vizaun foun ida, maibé la’ós liuhosi dalan Eleisaun Antesipada.

Portavóz ne’e hatutan, substánsia tolu ne’ebé aprezenta, MAL konfia líder nasionál sira sei hasoru-malu ho Prezidente Repúblika, ne’ebé sei foti desizaun ida-ne’ebé sei lori povu no rai ida-ne’e ba moris ida-ne’ebé hakmatek no prósperu.

Entretantu, Movimentu Asukai Lorosa’e nu’udár organizasaun masa ida-ne’ebé funda iha tinan 1975 ho nia membru sira mai hosi nível intelektuál, veteranu, joventude, estudante no entidade hotu-hotu ne’ebé iha interese ba kontribusaun dezevolvimentu nasionál liuhosi atividade sosiál, polítika no kulturál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here