Ilustrasaun Coronavírus. Imajen/bncampinas.com

DILI, 06 fevereiru 2020 (TATOLI)-Diretora Saúde Munisípiu Dili, Agostinha Seguradu hateten, komunidade Formoza inklui autoridade lokál sira lamenta ho fatin ne’ebé mak prepara ba izolamentu virus corona iha Sentru Saúde Formoza (SSF).

Tanba ne’e ezekutiva ne’e espera katak Vise-Ministru Estratéjiku Dezenvolvimentu Saúde ho Vise-Ministra Kuidadu Saúde Primaria bele konsidera kestaun ida ne’e.

“Ha’u mós ema krítika, husi komunidade sira liliu autoridade lokál sira lamenta tebes ho fatin ne’e. Autoridade lokál sira lamenta ho fatin izolamemtu iha Sentru Saúde formoza tanba hatene Corona virus; oinsá nia trasmisaun, ida ne’e komunidade sira hatene hotu,” Diretora Agostinha Segurado konsidera perante jornalista sira iha nia knaar fatin, SSF, ohin.

Tuir nia, lamentasaun ne’e komunidade no autoridade lokál sira lamenta tanba besik kedas ho komunidade sira-nia hela fatin.

“Maibé hakarak ka lakohi ita labele fó deit ba Ministériu Saúde liliu ita-nia na’in ulun sira hanesan Governu ne’ebé suporta duni Ministériu saúde ita bele haree katak indika fatin ne’ebé mak dook tebes husi komunidade sira ida ne’e mak ita tenke hanoin ba oin”.

“Hakarak ka lakohi Ministériu Saúde nia esforsu mak to’o iha ne’e liliu Sentru Saúde Formoza hodi sai fatin izolamentu ida ba moras corona no iha esperansa katak ba futuru ne’e ita haree fatin ne’ebé mak di’ak ba ita atu tau ema ne’ebé mak karik moras ba virus ida ne’e” nia reforsa.

Ezekutiva ne’e informa katak uma ne’ebé mak ita prepara ba fatin izolamentu ne’e uma médiku xinesa sira mak hela ba entaun agora sira iha ona rezidénsia foun ne’ebé mak Embaixada Xina prepara ba sira iha Bidau no sira muda dezde janeiru entaun ita mós husu kedas hodi utiliza maibé ita dehan uma ne’e prepara ba fatin izolamentu no sira mós suporta.

Maibé atu haree ba kompetensia atu dezide fatin hanesan saúde Munisípiu Dili labele dehan ba na’in ulun sira katak labele maske ita bele dehan la priense kritériu tanba hakarak ka lakohi Munisípiu Dili kopera ho Ministériu Saúde.

“Ita hein tanba Ministériu Saúde ho provizoriamente prepara duni kondisaun maibé ita hotu hamutuk iha fiar ida para moras corona ne’e la bele mosu iha ita-nia rain”.

Iha fatin hanesan, Xefe SSF, Jaimé do Santos hateten, fatin ida ne’ebé mak atu prepra ba fatin izolamentu ba virus corona ne’e uluk doutór xines sira mak hela ba. Entaun Vise-Ministru Estratéjiku Dezenvolvimentu Saúde mai observa no hadi’a fatin ne’e hodi prepara ba moras corona virus ne’ebé mak espalla daudaun iha nasaun sira seluk.

“Maibé depois loron rua hamoos hotu ha’u haree liliu atoridade lokál hanesan xefe suku, xefe aldeia no komunidade sira hela iha Formoza ne’e lamenta ho fatin ne’e tanba dehan fatin ne’e iha hela komunidade nia leet no moras ne’e mós perigozu no da’et lalais,” Xefe SSF, Jaimé do Santos informa.

Depois, nia hatutan, moras sira seluk ne’ebé iha Dili laran ne’e mós mai halo tratamentu iha SSF tanba ne’e mak sira mai protesta hateten se bele karik hateten Vise-Ministru Estratéjiku Dezenvolviementu Saúde bele karik halo fatin ba virus corona ne’e dook husi komunidade tanba moras ne’e perigozu no da’et lalais de’it tanba ne’e mak sira la konkorda fatin izolamentu ida ne’e.

“Maibé iha momentu ne’e mós ha’u dehan ba sira ne’e ami-nia boot sira mak deside ita boot sira la simu bele ba hato’o iha Diretora Saúde Munípiu Dili depois ba Nasionál no se mak responsabilidade ba ida ne’e karik ba direita de’it”.

“Hanesan pesoál saúde preokupa hotu. Se tau iha ne’e virus ne’e da’et ba komunidade sira ne’ebé mak mai konsulta iha Sentru Saúde Formoza depois mós fatin ida ne’e besik liu kampu futeból no movimentasaun mós maka’as, populasaun sira hela iha Sentru Saúde Formoza nia sorin mós barak liu tanba ne’e mak ita hotu preokupa,” nia esplika.

Maibé, profisionál saúde ne’e haktuir, autoridae lokál sira hato’o ona ba Ministériu Saúde liuhusi karta eskrita ida karik hato’o ona ba na’in ulun sira hodi haree ba ida ne’e. “Hau mós ko’alia ona ho Xefe Gabinete Vise-Ministra Kuidadu Saúde primaria nia no mós ho Diretór Lojístiku nian karik sira mós hato’o ona ba na’in ulun sira ida ne’e mak ha’u nia hanoin”.

“Fatin ne’e di’ak hela maibé kondisaun mak hanesan autoridade sira lamenta ne’e; autoridade sira dehan la’ós lakohi halo servisu iha ne’e maibé tenke prepara ba iha fatin seluk. Sira preokupa fatin ne’e tanba fatin ne’e prepara ba izolamentu ba moras ne’ebé mak perigozu liu ba populasaun sira-nia saúde tanba ne’e mak sira preokupa ida ne’e,” nia informa.

Notísia relevante:OMS: Iha Posibilidade Atu Interrompe Virus Nia Espalla

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here