Komandante Jerál PNTL, Komisáriu Faustino da Costa hala’o vizita ba postu Unidade Polísia Fronteira (UPF) iha liña fronteira hodi haree direita kondisaoens no servisu UPF nian Imajen/Mídia PNTL

DILI, 06 fevereiru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, kuarta (05/02/2020), hala’o vizita ba liña fronteira terrestre Timor-Leste nian iha Mota-Ain, Badut-Mean, Leo-Hitu, Nunura, kuartél Kompañia Alfha Tunubibi, Mozon, Memo no Postu Saburai, hodi haree kondisaun servisu  membru Unidade Polísia Fronteira (UPF) nian.

Komisáriu Faustino dehan, vizita ida ne’e hala’o hodi bele buka hatene dezafiu sira ne’ebé PNTL/UFP enfrenta hodi bele buka solusaun.

“Ita hotu akompaña situasaun ita nia rai laran no situasaun ida ne’ebé ohin loron la’ós Timor-Leste mesak mak preokupa, entaun iha semana hira liubá governu mós prepara antesipa oinsá atu bele haree kona-ba ita halo prevensaun ba virus Corona ida ne’ebé sai preokupasaun boot,” dehan Komisáriu Faustino liu husi komunikadu ne’ebé, ohin, Ajénsia TATOLI asesu husi Komandu PNTL.

Governu no Parlamentu Nasionál rasik iha loron tersa-feira liubá hasai ona rezolusaun hodi orienta liña ministériu hotu-hotu inklui PNTL atu halo kontrolu makas ba sidadaun estranjeiru sira hodi prevene virus Corona

“Ha’u kontaktu ho ministru interiór no ministru mós husu oinsá atu haree operasionalmente polísia sei haree seguransa iha fronteira mas liga liu-liu ba virus Corona ne’e, tanba ne’e, bainhira to’o iha fatin ne’e ajenda dahuluk ne’ebé ha’u halo maka hasoru diretór sira, xefe setór sira iha postu integradu,” Komisáriu Faustino da Costa hateten.

Liu husi sorumutuk sira iha postu polisia iha liña fronteira, diretór sira  mós hato’o saida maka sira sente no halo iha postu integradu liu-liu Mota-Ain, iha ne’ebá instala ona fatin izolamentu husi Organizasaun Saúde Mundiál (OMS) ne’ebé iha, maibé iha situasaun balun liu husi enkontru ne’e hotu-hotu aprezenta buat ida katak maski sira halo hela servisu mós ba iha parte ida ne’e liga ho ema sira ne’ebé sai husi Indonézia tama mai Timor-Leste.

Durante hala’o vizita, Komisáriu Faustino  observa direita kondisaun reál  ne’ebé membru UPF sira hasoru iha servisu fatin, susesu ne’ebé sira halo, dezafiu no obstákulu ne’ebé sira hasoru.

Durante hala’o vizita, Komisáriu Polísia Faustino akompaña husi Inspetór Jerál Superintendente Xefe Carlos Jerónimo no Komandante UPF, Superintendente João Belo.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here