Xefe Estadu Maiór Jenerál F-FDTL, Lere Anan Timur presta omenajen ba Saudozu Majór de Infantaria, Moisés Guimarães “Piksy Mau” iha Kartél Jenerál F-FDTL, Fatuhada, Dili, 06 fevereiru 2020. Imajen/Eugénio Pereira

DILI, 06 fevereiru 2020 (TATOLI)- Komandu FALINTIL-Forsa Defeza Timor-Leste (F-FDTL) ho Governu liu husi Ministériu Defeza no Ministériu Interiór, ohin, presta omenajen ikus ba Saudozu Majór de Infantaria, Moisés Guimarães “Piksy Mau” iha Kartél Jenerál F-FDTL, Fatuhada, Dili.

Matebian hakotu iis  iha  kuarta (05/02/2020), tuku 16:28 Otl, iha ninia rezidénsia Kampu Tuti, Suku Bebonuk, Postu Administrativu Don Aleixo, Munisípiu Dili, tanba sofre moras tensaun no diária.

Funu na’in FALINTIL ne’e husik hela nia feen kaben, Joana Soares ho oan na’in hitu (7); mane tolu (3) no feto na’in haat (4) ne’ebé daudaun ne’e sei hala’o hela sira nia estudu.

Xefe Estadu Maiór Jenerál F-FDTL, Majór Jenerál Lere Anan Timur dehan, Komandu F-FDTL no maluk veteranu rezisténsia sira lakon funu na’in di’ak ida  hanesan Piksy Mau nu’udar asuwa’in ida ne’ebé brani luta mós ba Timor-Leste durante funu tinan 24 iha ai-laran.

Lere fó sasin katak,  Saudozu  Piksy Mau nu’udar alin no família durante funu too ukun aan ne’e fó kontribuisaun makas ba FALINTIL-FDTL.

“Ha’u nia alin Piksy Mau ami hamutuk iha ai-laran tinan 24, dezde hahú funu ne’e nia assume kargu komandante seksaun too funu hotu, forma fali FALINTIL-FFDTL nia mak xefe Informasaun Zota Dois (Z2) nia kontribuisaun makas tebes, ohin ha’u sente katak, ita lakon funu na’in di’ak ida,” hateten Lere Anan Timur.

Lere dehan, moras ne’ebé saudozu sofre dezde uluk kedas ba hala’o ona tratamentu saúde iha ospitál Singapura no fila fali mai Timor-Leste kontinua moras derrepente too nia hakotu iis.

“Ohin o husik ona ami, ita uluk terus hamutuk harii nasaun ida ne’e, no uluk o terus no susar husik o nia kosar been no o nia maluk rihun ba rihun ita hakat hamutuk hodi defende nasaun ne’e sai Estadu demokrátiku ida,”  Lere hateten.

Komandante Lere husu ba Governu Timor-Leste atu kontinua tau matan ba feto faluk oan kiak sira.

“Labele ko’alia de’it hahú kedas husi Saudozu “Ular Rihik” uluk mate governu ko’alia dehan atu halo uma fó rai ate agora la iha, mais ami nu’udar maun alin loloos husi terus no susar sei tuur hamutuk para buka solusaun ba problema ne’e,” Lere promete.

Lere dehan, ohin loron ne’e sorte nasaun ne’e veteranu sira maka ukun, tanba ne’e hanesan jenerál nia nunka halo problema. Tanba lider sira ukun promete buat oin-oin, maibé la realiza sira nia promesa hodi tau matan ba veteranu no família oan kiak sira.

“Ha’u jenerál ida pasiénsia liu ona, se ha’u maka jenerál sira seluk karik, dala ruma sira balun ohin loron la moris ona iha Timor. Sorte, ita veteranu de’it maka ukun ne’e. Primeiru Ministru veteranu, prezidente mós veteranu e tanba ida ne’e maka pasiénsia atu halo rai ne’e ba oin,” tenik Lere.

Iha fatin hanesan, Ministru Defeza no Ministru Interiór Interinu, Filomeno da Paixão de Jesus dehan, governu mós sente lakon veteranu ida.

Ministru Filomeno dehan, Majór de Infantaria, Piksy Mau fó ezemplu di’ak tebes durante nia moris fó ona kontribuisaun barak hahú husi luta too kontribui ba dezenvolvimentu F-FDTL.

“Señor Majór Piksy Mau fó ezemplu di’ak tebe-tebes hatudu valór di’ak sai ezemplu ba ita militár hotu- hotu. Lori VIII Governu nia naran ami hato’o ami nia solidariedade ba família no oan sira,” Ministru Filomeno Paixão hateten.

Filomeno dehan, governu sei halo esforsu hotu- hotu hodi tau matan ba família sira hanesan mós veteranu sira seluk ne’ebé mate ona ba rai ne’e.

Parte seluk, reprezentante Veteranu Rejiaun I nu’udar mós membru Parlamentu Nasionál, José Agostinho Sequeira “Somotxo” husu ba governu presiza kria kondisaun tau matan ba saúde militár sira inklui veteranu sira ne’ebé reforma ona ba vida sivíl.

“Ne’e hanesan moe boot ida ba ita, tanba militár ativu ida tuir loloos labele mate arbiru, tanba militár ne’e tenke iha ospitál no buat hotu- hotu iha para tau matan ba saúde militár nian,” Somotxo tenik.

Nia husu ba governu presiza harii ona ospitál militár ida modernu para tau matan ba saúde militár no veteranu sira ne’ebé luta ba rai ne’e.

“Ita presiza duni iha ospitál militár, tanba Governu Xina promete ona atu harii ita presiza tau atensaun ba kestaun ne’e,” nia espera.

Hafoin hala’o tiha serimónia despedida ho parede militár, família no Komandu F-FDTL lori kedas mate isin ba iha Suku Lore I, Postu Administrativu Lospalos, Munisípiu Lautem, hodi hala’o tiha serimónia kulturál to’o loron domingu (09/02/2020), lori mai haloot  iha Jardín Eroi Metinaro, Dili.

Biografia  Saudozu Piksy Mau 

Saudozu Moisés Guimarães “Piksy Mau”.

Saudozu Piksy Mau, moris iha Lore I, Postu Administrativu Lospalos, Munisípiu Lautem, iha loron 15 maiu 1963. Moris husi família agrikultór João Baptista no Lorenço Guimarães. Maun alin hamutuk na’in 12. Sa’e ba ai-laran hamutuk ho maun alin na’in tolu maibé sira na’in tolu mate hotu, hela de’it Piksy Mau ne’ebé reziste tinan 24 to’o Timor-Leste ukun rasik aan.

Iha 1974 to’o 1975, frekuenta eskola primária iha Lospalos. Invazaun Indonézia nian ba Timor-Leste iha 7 Dezembru 1975, husik nia la konsege finaliza nia estudu no hela de’it ho 2¬a klase. No hahú tama ba Organizasaun Populár Juventude Timor (OPJT) no kontinua enkaixa kedan iha seguransa Auto Defeza Arma Branca, no evakua ba ai laran halo rezisténsia to’o 1999.

Lakon nia maun alin na’in tolu iha ai laran no nia família iha vila desterra ba Ataúru no ba Caelaco, halo nia determinadu liután atu kontinua funu to’o hetan ukun-rasik aan.

Piksy Mau funu ho postu soldadu to’o 1997. No iha 1998 to’o 1999 asume kargu Komandante Seksaun. Rejista mós katak iha 1982-1984 Piksy Mau hetan fiar nu’udar eskolta ba Komisáriu Polítiku Maubelis. Hafoin ne’e, envolve fali iha grupu Koto Moruk hodi halo ligasaun ho Kruzeiru no Sentru hodi asegura movimentu Komandante em Xefe das FALINTIL, Kay Rala Xanana Gusmão.

Iha tinan 2001, Piksy Mau tama Instituisaun F-FDTL no hafoin liu husi dalan naruk ohin loron hetan diviza Majór.

Piksy Mau foin forma família iha 2002 no iha oan na’in-hitu. Hanoin fali funu naruk ne’ebé nia halo, nia halo esforsu oioin hodi investe ba nia oan sira nia edukasaun, atu nia oan sira bele kontribui ba nasaun tuir dalan ne’ebé nia hahú tiha ona.

Iha loron 19 Maiu 2007, veteranu Piksy Mau hetan kondekorasaun Orden Gerrilla husi Estadu Timor-Leste, rekoñese nia envolvimentu iha Frente Armada durante tinan 24.

No iha 28 Novembru 2019, hetan kondekorasaun Medalla Orden Timor-Leste husi Prezidente Repúblika, Francisco Guterres Lú Olo, Deskansa ho Dame, Eroi Libertasaun da Pátria.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here