Ministra Finansa en-ezersísiu, Sara Lobo Brites. Imajen Tatoli/ Egas Cristovão.

DILI, 06 fevereiru 2020 (TATOLI)—Ministra Finansa Interina atuál Vise-Ministra Finansa, Sara Lobo, hateten inserteza polítika ne’e to’o marsu mak laiha solusaun, Governu sei halo proposta lei ida husu autorizasaun ba Parlamentu Nasionál (PN), nune’e halo levantamentu ba fundu petrolíferu.

“Se situasaun to’o marsu ita sei iha saldu natoon atu finansia, maibé karik maka saldu tezouru la to’o, ne’e ha’u hanoin Governu tenke aprezenta proposta ba Parlamentu para bele husu levantamentu”, Ministra Finansa Interina ne’e informa ba Agência TATOLI, hafoin hala’o audisaun ho Komisaun C (Finansa Públika), kona-ba Konta Jerál Estadu, iha Parlamentu Nasionál, kinta ne’e.

Tanba, tuir nia, saldu iha tezouru to’o 31 janeiru 2020 hamutuk millaun $254. Hosi orsamentu ne’e, millaun $116.4 finansia orsamentu duodésimu iha fulan-janeiru nian.

Antes ne’e, Governu liuhosi desizaun koletiva Konsellu-Ministru aprova tan millaun $116,449,057 hodi finansia orsamentu duodésimu fulan-fevereiru nian.

“Kuandu ami haree saldu la to’o, Ministériu Finansa sei propoin ba señor Primeiru-Ministru para halo proposta lei ida mai Parlamentu, nune’e Parlamentu bele halo levantamentu”, Sara informa.

Ministra Finansa En-ezersísiu ne’e hateten, dalan di’akliu maka Governu husu autorizasaun ba Parlamentu Nasionál hodi halo levantamentu ba fundu petrolíferu hodi finansia mákina Estadu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here