Diretór Ezekutivu SERVE, IP, Flornêncio Sanches, hatudu hela sistema SIGAS ne’ebé estabelese, ohin, iha Baucau, Bobonaro no RAEOA. Imajen/Florencio Miranda Ximenes.

DILI, 06 fevereiru 2020 (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE,IP), Florêncio Sanches, hateten edifísiu foun SERVE  nian ne’ebé, ohin, Ministru Koordenadór Asuntu Ekonómiku internu, Fidelis Manuel Leite Magalhães, loke ofisiál ne’e, halo arrendamentu ho na’in ba Empreza Palm Spring and Trade Centre ho kustu kada fulan rihun $11.

“Ami arrenda edifísiu ne’e tanba hetan autorizasaun husi Governu no ami buka fatin maibé só edifísiu ne’e mak folin baratu ho kada fulan rihun $11”, Diretór Ezekutivu SERVE afirma iha Hudi-laran, Bairru Pité, ohin.

Diretór Ezekutivu ne’e dehan haree ba presu arrenda ne’e tuun, nune’e SERVE deside halo kontratu durante tinan lima nian laran.

Hodi dehan kada fulan SERVE bele hetan rendimentu rihun $50 ne’ebé aloka mós rihun $11 ba selu edifísiu foun ne’ebé kompleta ho salaun atendimentu públiku no administrasaun.

“Sura ba mai ita sei konsege salva osan porsentu 50 hosi rendimentu ne’ebé kada fulan SERVE hetan tanba polítika ha’u-nian katak ita labele depende ba Orsamentu Jerál Estadu”, adianta.

Nune’e, Florêncio Sanches dehan pelumenus ho edifísiu foun ne’e bele fasilita ona servisu liuliu atendimentu ba sidadaun sira ne’ebé halo atividade ekonómika ka negósiu ho lais.

“Durante ita hetan fatin foun, ha’u promote ba públiku katak liuhosi edifísiu foun ne’e ami sei halo atendimentu ida di’ak no lalais liu”, garante.

SERVE mós halo ona proposta ba Governu atu konstrui edifisiu foun andár 10 ho kustu millaun $8 ne’ebé Governu aseita no tau ona iha livru teste OJE 2023 atubele konstrui no kompleta ho sistema instalasaun ba rejistu nian.

“Edifísiu foun ne’e iha ha’u-nia proposta, la’ós SERVE mesak maibé  sei hamutuk ho TradeInvest no DNTT no Ministériu Finansa no Ministériu Turizmu, Komérsiu no Indústria (MTKI)  ne’ebé halo atendimentu públiku liuliu taxa nian no halo lisensiamentu”, adianta.

Ministru Koordenadór Asuntu Ekonómiku Internu, Fidelis Manuel Leite Magalhães, dehan iha faze ida ne’e SERVE nia edifísiu foun tranzitóriu, maibé iha ekipamentu foun atubele kontribui no hadi’ak liután atendimentu servisu ba sidadaun sira.

“Ita iha faze ida ne’e, ha’u aprova tiha ona planu  asaun tinan tomak iha 2020 ne’e atu hadi’a hotu prosesu hira legál no prosesu administrativa iha SERVE relasiona lisensiamentu no rejistu ba negósiu iha edifísiu foun ne’e”, salienta.

Eis Deputadu Bankada PLP ne’e dehan Oitavu Governu halo ona enkontru dahuluk bá vizita SERVE nia fatin, mas nota katak kualidade rekursu umanu no lojístika no edifísiu presiza hadi’a atu atende sidadaun ho di’ak.

“Tanba ne’e, ami orienta kedan tenke hadi’a kualidade servisu, ne’ebé ha’u hasolok tanba SERVE responde ho forma pozitivu tebes hodi hadi’a kedan uma laran”, hakotu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here