Primeiru-Ministru, Taur Matan Ruak. Imajen Tatoli/António Gonçalves

DILI, 06 fevereiru 2020 (TATOLI)–Primeiru-Ministru (PM), Taur Matan Ruak lori Estadu Timor-Leste (TL) nia naran agradese ba sentida solidariedade husi Governu Nova Zelándia hodi halo evakuasaun ba estudante na’in-17 husi sidade Wuhan, Xina, atu hadook sira husi Virus Corona.

“Ha’u ho kualidade nu’udár Primeiru-Ministru lori Governu no Estadu Timor-Leste nia naran, agradese ba Primeira-Ministra Nova Zelándia, ho nia povu tanba bele fó apoiu ba ita-nia estudante sira iha situasaun ida-ne’ebé difísil”, Taur hato’o agradesimentu ne’e, hafoin hala’o enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Taur hateten, durante enkontru semanál, informa ba Xefe Estadu kona-ba preparativu sira ba Virus Corona nian, katak, Governu halo asaun lubuk ida maka hanesan halo rezolusaun ida atu bele prevene no kontrola virus ne’e labele mai Timor-Leste.

Lee mós: MNEK iha Ona Kontaktu Evakua Bolseiru Timoroan iha Wuhan ba País Seluk

Aleinde ne’e, Xefe Governu hatutan, Governu Timor-Leste opta regulamentu sanitáriu internasionál atubele sai matadalan hodi orienta oinsá serbisu halo kontrolu ba movimentu sidadaun sira mai Timor-Leste.

“Ita mós interdita tempu ruma, ema ne’ebé mai husi zona Xina nian, atinjidu, mai iha ita nia rain. Ita husu atu sira bele iha atestadu médiku ho seguransa no iha serteza katak sira kona karik, bainhira sira presiza bá karantina, sira tenke bá. Ida seluk maka ita mós halo esforsu evakua ita-nia sidadaun liuliu estudante timoroan na’in sanulu resin-hitu ne’e. Ita husu apoiu husi país barak, maibé ita la konsege. Hanoin atu bá foti rasik, maibé jeralmente ita iha apoiu husi Governu no povu Nova Zelándia nian”, Taur subliña.

Nia mós informa katak, to’o oras ne’e, Governu seidauk iha informasaun ruma kona-ba saúde husi estudante timoroan na’in-17.

“Ita seidauk iha informasaun maibé rekizitu saúde maka hatudu katak tenke hela iha Nova Zelándia durante loron 14. Bainhira liu tiha loron 14 no la hetan buat ida, ita bele evakua mai ita nia-rain. Bainhira iha problema ruma, ne’e naturalmente ita iha asisténsia médika no prosesu sei bá tan, tanba iha Timor laiha zona izolamentu atu halo”, Taur esplika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here