Masin-midar iha armazein Perissos, Fatuhada. Imajen/Antónia Gusmão.

DILI, 06 fevereiru 2020 (TATOLI) – Diretór Empreza Perissos, James Jong, garante kualidade produtu importadu hanesan foos, masin-midar no hemun sira ba konsumidór. 

James Jong hatete produtu sira ne’e mak iha armazein Perissos ne’ebé fa’an ka distribui ba komunidade ou supermerkadu sira iha Dili laran no munisípiu.

“Sasán sira ne’e kuandu tama, iha sertifikadu saúde nian, tanba lori mai mós Alfándega husu uluk sertifikadu, ne’ebé kuandu laiha sertifikadu sasán sira ne’e ami labele hatama, tan ne’e ha’u dehan sasán sira ne’e kualidade no iha sertifikadu hosi Ministériu Saúde”, James Jong dehan hafoin simu ekipa Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA) bainhira hala’o inspesaun iha armazein Perissos, Fatuhada, ohin.

Hodi dehan garante kualidade produtu, nune’e prontu atu distribui ba nia kompradór sira tanba antes lori sasán ne’e mai, halo uluk teste.

James Jong hatete sasán sira ne’ebé Perissos importa kada fulan barak liu maka foos no masin-midar kontentór 20.

Sobre produtu sira liu prazu, James Jong, afirma empreza serbisu hamutuk ho AIFAESA lori bá halo destruisaun ou sunu iha Tibar no kona-ba foos fahe ba komunidade hodi fó han ba animál.

Perissos importa produtu sira hosi Indonézia, Malázia no Tailándia, no sasán ne’e rai iha armazein empreza nian hamutuk neen.

Notísia relevante : AIFAESA Identifika Empreza Perissos Troka Saku Masin-Midar Ne’ebé Liu Prazu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here