Primeiru-Ministru, Taur Matan Ruak. Imajen Tatoli/Egas Cristóvão

DILI, 06 fevereiru 2020 (TATOLI)–Primeiru-Ministru (PM), Taur Matan Ruak, aprezenta ba Xefe Estadu, Francisco Guterres Lú Olo katak ezekusaun orsamentu duodésimu fulan-janeiru la to’o pursentu 50 tanba membru VIII Governu Konstitusionál no Parlamentu Nasionál Kinta Lejizlatura, konsentra ba diskusaun Orsamentu Jerál Estadu (OJE) tinan 2020.

Primeiru-Ministru hato’o asuntu ne’e, hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Dili, ohin.

“Ita-boot sira hatene, iha janeiru liubá ita iha debate Orsamentu Jerál Estadu tinan 2020, ema hotu konsentra ba debate, entaun tempu ezekusaun ba Orsamentu Duodésimu menus liu. Tanba ne’e, ita-nia kapasidade ezekusaun la to’o pursentu 50, no espera katak fulan ida-ne’e bele atinje”, Taur informa ba mídia.

Nia hatutan, bainhira orsamentu ne’e xumba tiha iha Parlamentu Nasionál, maka foin hasai rezolusaun hodi hasai desizaun atubele opta ba duodésimu.

Primeiru-Ministru mós aproveita hodi aprezenta ba Prezidente Repúblika kona-ba Dotasaun Orsamentu Temporáriu (DOT) ba fevereiru 2020 ho montante $116.449.057.

Montante totál despeza fahe ba kategoria haat maka hanesan saláriu no vensimentu $17.852.067, bens no serbisu $38.614.980, transferénsia públika $26.591.048 no kapitál dezenvolvimentu $33.390.953.

Entretantu, Dotasaun Orsamentu Temporáriu ba fulan-janeiru 2020 ho valór millaun $116.4. Orsamentu ne’e, fahe ba kategoria saláriu no vensimentu hamutuk millaun $17,8, bens serbisu millaun $38, 6, transferénsia públika millaun $26,6 no kapitál dezenvolvimentu millaun $33,4, kapitál menór suspende tanba relativa ho prosesu aprovizionamentu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here